રિઝર્વ બેન્ક તા. 1 ડિસેમ્બરે રિટેલ ડિજિટલ રૂપિ (e₹-R) લોન્ચ કરશે

પાયલોટ પ્રોજેક્ટ હેઠળ પ્રથમ તબક્કામાં મુંબઈ, નવી દિલ્હી, બેંગલુરુ અને ભુવનેશ્વરને આવરી લેવાશે

મુંબઈઃ આરબીઆઈ દ્વારા સત્તાવાર પ્રથમ દેશની ડિજિટલ કરન્સી રિટેલ ડિજિટલ રૂપિ (e₹-R) 1 ડિસેમ્બરે લોન્ચ થશે. લોન્ચિંગના પ્રથમ તબક્કામાં પંસદ કરાયેલા શહેરોમાં ક્લોઝ્ડ યુઝર ગ્રુપને આવરી લેતાં ગ્રાહકો અને વેપારીઓને ડિજિટલ રૂપિની સેવાઓ પ્રાપ્ત થશે. ડિજિટલ કરન્સી માટે આરબીઆઈએ આઠ બેન્કો સાથે જોડાણ કર્યું છે. પ્રથમ તબક્કામાં સ્ટેટ બેન્ક ઓફ ઈન્ડિયા, આઈસીઆઈસીઆઈ બેન્ક, યસ બેન્ક અને આઈડીએફસી ફર્સ્ટ બેન્ક સાથે ડિજિટલ રૂપિની સેવાઓ શરૂ કરવામાં આવશે. બાદમાં બીજા તબક્કામાં વધુ ચાર બેન્કો- બેન્ક ઓફ બરોડા, યુનિયન બેન્ક ઓફ ઈન્ડિયા, એચડીએફસી બેન્ક અને કોટક મહિન્દ્રા બેન્કને આવરી લેવામાં આવશે. e₹-R રોકડ જેવી જ સુવિધાઓ પ્રદાન કરશે જેમાં વિશ્વસનીયતા, સલામતી વધુ છે. રોકડની જેમ તેમાં કોઈ વ્યાજની કમાણી કરી શકાશે નહીં. બેન્કોમાં તેને ડિપોઝિટ જેવા કોઈપણ ઈન્સ્ટ્રુમેન્ટમાં કન્વર્ટ કરી શકાશે.

અમદાવાદમાં બીજા તબક્કામાં સેવાઓ શરૂ થશે

પ્રથમ તબક્કાના ટ્રાયલમાં મુંબઈ, નવી દિલ્હી, બેંગ્લુરુ અને ભુવનેશ્વરમાં ડિજિટલ રૂપિ લોન્ચ કરાશે. બાદમાં અમદાવાદ, ગંગટોક, ગુવાહાટી, હૈદરાબાદ, ઈન્દોર, કોચી, લખનઉ, પટના અને શિમલા સુધી વિસ્તરણ કરશે. પાયલોટ લોન્ચિંગનું વિસ્તરણ બેન્કો-ગ્રાહકો અને સ્થળની જરૂરિયાત અનુસાર થશે.

કેવી હશે ડિજિટલ કરન્સી?

RBI અનુસાર, e₹-R એ ડિજિટલ ટોકનના સ્વરૂપમાં હશે જે કાનૂની ટેન્ડરનું પ્રતિનિધિત્વ કરે છે

તે હાલમાં ચલણી નોટો અને સિક્કાની માફક માન્ય ગણાશે. અને બેન્કો દ્વારા વિતરણ કરાશે

જોડાણ કરેલી બેન્કો અને મોબાઈલ ફોન-ડિવાઈસમાં ઉપલબ્ધ ડિજિટલ વોલેટ મારફત e₹-Rના ટ્રાન્જેક્શન થઈ શકશે

ટ્રાન્જેક્શન પી2પી, પી2એમમાં થઈ શકશે. વેપારીઓને ક્યુઆર કોડ મારફત પેમેન્ટ કરી શકાશે