મહાત્મા મંદિર ખાતે 8થી 10 ડિસેમ્બર રેફકોલ્ડ ઈન્ડિયા યોજાશે

અમદાવાદ: કોલ્ડ ચેઈન અને રેફ્રિજરેશન ઉદ્યોગનાં સોલ્યુશન્સ અંગે દક્ષિણ એશિયાનું સૌથી મોટું પ્રદર્શન અને કોન્ફરન્સ, REFCOLD India નું પાંચમુ એડિશન મહાત્મા મંદિર, ગાંધીનગર ખાતે તા.8 થી 10 ડિસેમ્બર, 2022 દરમ્યાન યોજાઈ રહ્યા છે. રેફકોલ્ડ ઈન્ડિયા એ ધ ઈન્ડિયન સોસાયટી ઓફ હીટીંગ, રેફ્રિજરેટીંગ અને એર કન્ડીશનીંગ એન્જીનિયર્સ (ISHRAE) નું આયોજન છે. આ સંસ્થા 44થી વધુ ચેપ્ટર્સ અને આશરે 30,000 પ્રોફેશનલ સભ્યો ધરાવે છે. ISHRAE, બાંગ્લાદેશ, નેપાળ, શ્રીલંકા, કેન્યા અને અબુ ધાબીમાં પણ પોતાના ઈન્ટરનેશનલ ચેપ્ટર્સ શરૂ કરી રહ્યું છે. ISHRAE રેફ્રિજરેશન અને કોલ્ડ ચેઈન ઈન્ડસ્ટ્રીના વિકાસ માટે સક્રિય કામગીરી કરી રહ્યું છે અને તેનો ઉદ્દેશ ઉત્તમ ટેકનોલોજી સોલ્યુશન્સ રજૂ કરીને આ ક્ષેત્રના વિકાસમાં વૃધ્ધિ કરવાનો છે.

રેફકોલ્ડ ઈન્ડિયા ભારતીય અને આંતરરાષ્ટ્રિય રેફ્રિજરેશન ઉદ્યોગના સહયોગીઓને એકત્ર કરીને ખોરાકનો બગાડ દૂર થાય તેવા ઈનોવેશન અને ટેકનોલોજી રજૂ કરશે. કોલ્ડ ચેઈન મેનેજમેન્ટ કે જેમાં રેફ્રિજરેટેડ સ્ટોરેજ અને રેફ્રિજરેટેડ ટ્રાન્સપોર્ટેશનનો સમાવેશ થાય છે અને આ ક્ષેત્રો ઉદ્યોગની સપ્લાય ચેઈનનો આંતરિક હિસ્સો બની રહ્યા છે.

ISHARE ના નેશનલ પ્રેસિડેન્ટ- એનએસ ચંદ્રશેખર જણાવે છે કે “રેફકોલ્ડ ઈન્ડિયા રેફ્રિજરેશન અને કોલ્ડ ચેઈન ઉદ્યોગના તમામ ક્ષેત્રોને એક જ સ્થળે એકત્રિત કરશે અને સાથે સાથે કોલ્ડ ચેઈન અને રિફર ટ્રાન્સપોર્ટેશન તરફ ધ્યાન કેન્દ્રિત કરતું આ એક માત્ર પ્રદર્શન છે. અમને એક્ઝીબીટર્સ તરફથી અદ્દભૂત પ્રતિસાદ મળ્યો છે અને આ સમારંભ વધુ એકવાર અત્યંત સફળ બની રહેશે તેવો અમને વિશ્વાસ છે.” ઈનોવેટીવ પ્રોડક્ટસ અને સ્ટાર્ટઅપ્સની ટેકનોલોજીનું મહત્વ પારખીને આ વિષયનો એક ડેડીકેટેડ પેવેલિયન આ સમારંભનો હિસ્સો બની રહેશે.

રેફકોલ્ડ ઈન્ડિયાના ચેરમેન પંકજ ધારકર જણાવે છે કે ફૂડ મેન્યુફેક્ચરર્સ અને ડેરી ક્ષેત્ર, ફ્રોઝન અને ચીલ્ડ ફૂડઝ, હોલસેલ ડિસ્ટ્રીબ્યુશન અને રિટેઈલ, રિફર ટ્રાન્સપોર્ટેશન, ફાર્મા અને હેલ્થકેર, પોર્ટસ, શિપીંગ કંપનીઓ અને અન્ય ક્ષેત્રોના પ્રતિનિધીઓ રેસ્કોલ્ડ ઈન્ડિયાની મુલાકાત લેશે અને રેફ્રિજરેશન અને કોલ્ડ ચેઈન ઈન્ડસ્ટ્રીમાં કેટલીક અત્યંત આધુનિક ટેકનોલોજીસ અને ઈનોવેશન્સ નિહાળશે. રેફકોલ્ડ ઈન્ડિયાને ઈન્ટરનેશનલ ઈન્સ્ટીટ્યુટ ઓફ રેફ્રિજરેશન (IIR), એર કન્ડીશનીંગ એન્ડ રેફ્રિજરેશન, મેન્યુફેક્ચરર્સ એસોસિએશન (ISKID), ઈન્સ્ટીટ્યુટ ઓફ રેફ્રિજરેશન (IOR), UNEP, ધ ચાઈનીઝ એસોસિએશન ઓફ રેફ્રિજરેશન જેવી અનેક આંતરરાષ્ટ્રિય એસોસિએશન્સ અને વૈશ્વિક સંસ્થાઓનો સહયોગ પ્રાપ્ત થયો છે.