ક્રિપ્ટો કરન્સી સર્વિસ આપવામાં 50 ટકાથી વધુ NFC અને 27 ટકા સંસ્થાઓનું નિરુત્સાહી વલણ

અમદાવાદ, 2 જૂનઃ ચોક્કસ માપદંડો, રેગ્યુલેટરી નિયંત્રણો ન હોવાથી ક્રિપ્ટો માર્કેટમાં ફ્રોડ, હેકિંગ, સાયબર હુમલાઓનું પ્રમાણ વધતાં હવે ક્રિપ્ટો કરન્સી ક્ષેત્રની કંપનીઓ જ પાછી પાની કરી રહી છે. ગ્લોબલ ઈનોવેશન્સ રિપોર્ટ 2023 અનુસાર, લગભગ અડધી (48%) નોન-ફાઇનાન્સિયલ કંપનીઓ અને 27% ફાઈનાન્સિયલ સર્વિસ ફર્મ્સને કોઈપણ પ્રકારની ક્રિપ્ટોકરન્સી સેવાઓ વિકસાવવામાં કોઈ રસ નથી. ઉલ્લેખનીય છે કે, માત્ર 7% નાણાકીય સેવાઓ આપતી કંપનીઓએ ક્રિપ્ટો સંબંધિત સેવાઓ 3 વર્ષ માટે બંધ કરવાનું નક્કી કર્યું હોવાનું જણાવ્યું છે. નિયમનકારી માળખા તેમજ ક્રિપ્ટો ઇન્ફ્રાસ્ટ્રક્ચર અને ઇકોસિસ્ટમ્સની સામાન્ય અપરિપક્વતા ઉપરાંત, બિન-નાણાકીય સેવાઓ આપતી કંપનીઓ સાયબર સુરક્ષા વિશે ચિંતિત છે. નાણાકીય સેવાઓના સાથીદારો આંતરિક કૌશલ્યોનો અભાવ, પર્યાવરણીય અસર અને કર વિશેની અનિશ્ચિતતાના પગલે ક્રિપ્ટો મામલે વિચારતા ખચકાટ અનુભવી રહ્યા છે.

ક્રિપ્ટોકરન્સી સેવાઓ  સામેના સૌથી મોટા અવરોધો એક નજરે

ફાઈનાન્સિયલ સર્વિસિઝ કંપનીઓ માટેઃ 30 ટકા ફાઈનાન્સિયલ સર્વિસિઝ કંપનીઓ ટેક્નોલોજી ઈન્ફ્રાસ્ટ્રક્ચરના અભાવે ક્રિપ્ટો સેવાઓ આપવા અસક્ષમ છે. જ્યારે 27 ટકા કંપનીઓ યોગ્ય ઈકોસિસ્ટમ ધરાવતી નથી. 26 ટકા કંપનીઓ પાસે કોઈ ટેક્નિકલ સ્કીલ નથી. 26 ટકા નાણાકીય સેવાઓ આપતી કંપનીઓ સાયબર સિક્યુરિટી, ટેક્સ સંબંધિત અનિશ્ચિતતાઓ અને પર્યાવરણ થતી અસરો વિશિ ચિંતિત છે.

નોન-ફાઈનાન્સિયલ સર્વિસિઝ માટેઃ 30 ટકા કંપનીઓ સાયબર હુમલાઓ, જ્યારે 29 ટકા બેન્કો અને અન્ય નાણાકીય સેવા પ્રદાતાઓ પાસે ક્રિપ્ટો સેવાઓની અનુપબલ્ધિના કારણે ક્રિપ્ટો સેવાઓ આપવા માગતી નથી. વધુમાં, 28 ટકા ટેક્નોલોજી ઈન્ફ્રાસ્ટ્રક્ચર અને 27 ટકા ઈકોસિસ્ટમના અભાવે ક્રિપ્ટો માર્કેટથી દૂર રહેવા માગે છે.  24 ટકા ક્રિપ્ટોકરન્સીની વોલેટિલિટી અને 23 ટકા ક્રિપ્ટો પ્લેટફોર્મ્સ અને પ્રોટોકોલ વચ્ચેના સંચાલનનો અભાવે જોખમ લેવા માગતી નથી.

વૈશ્વિક સ્તરે 2017માં જ્યારે બિટકોઈન તેની ઓલટાઈમ હાઈ સપાટી 20 હજાર ડોલરે પહોંચ્યો હતો, ત્યારે ક્રિપ્ટોકરન્સીનો બબલ ફૂલ્યો-ફાલ્યો હતો. 2020માં કોવિડ મહામારીના કારણે ક્રાઈસિસ વધતાં ક્રિપ્ટોકરન્સી માર્કેટમાં રોકાણ વધ્યું હતું. 2021માં બિટકોઈન, ઈથેરિયમ સહિત ઘણી ક્રિપ્ટોકરન્સી તેની ઐતિહાસિક ટોચે પહોંચી હતી. પરિણામે ક્રિપ્ટો માર્કેટમાં રિટેલ ટ્રેડર્સનું પ્રમાણ વધ્યું હતું.

છેલ્લા 24 કલાકમાં 30 નવા ક્રિપ્ટો ટોકન લિસ્ટેડ થયાં

વિશ્વભરમાંથી ક્રિપ્ટો ટોકન લોન્ચિંગની સંખ્યા વધી રહી છે. ક્રિપ્ટો માર્કેટની વોલેટિલિટીના પગલે આ પ્રક્રિયા મંદ પડી હતી. પરંતુ હવે ધીમે-ધીમે ફરી વધતી નજરે ચડે છે. કોઈનમાર્કેટકેપ ડેટા અનુસાર, છેલ્લા 24 કલાકમાં 30 જેટલા નવા ક્રિપ્ટો ટોકન લિસ્ટેડ થયા છે. આ સાથે કુલ અંદાજિત 25391 ક્રિપ્ટો ટોકન માર્કેટમાં ટ્રેડ થઈ રહ્યા છે.