Stock Market Today: સેન્સેક્સમાં 600 પોઈન્ટનો ઉછાળો, નિફ્ટી 25310 પાર
અમદાવાદ, તા. 16 નવેમ્બરઃ દિવાળીની રજાઓ બાદ શેરબજારમાં રોકાણકારોની વાપસી જોવા મળી છે. સેન્સેક્સ અને નિફ્ટીએ આકર્ષક ઊછાળા સાથે સપ્તાહની શુભ શરૂઆત કરી છે. સેન્સેક્સ આજે 218 પોઈન્ટના વધારા સાથે ખૂલ્યા બાદ 639.33 પોઈન્ટ ઉછળ્યો હતો. નિફ્ટીએ પણ 25300ની સપાટી ક્રોસ કરી આગેકૂચ કરી હતી.
સેન્સેક્સ સવારે 9.42 વાગ્યે 586.52 પોઈન્ટના ઉછળા સાથે ટ્રેડ થઈ રહ્યો હતો. નિફ્ટીમાં 141.65 પોઈન્ટના ઉછાળે 25285.95ના સ્તરે કારોબાર થઈ રહ્યા હતા. બેન્ક નિફ્ટી 396.45 પોઈન્ટના ઉછાળે ટ્રેડ થઈ રહ્યો હતો. સેન્સેક્સ પેકમાં સામેલ ભારતી એરટેલ 2.90 ટકા, એશિયન પેઈન્ટ 2.37 ટકા, આઈટીસી 2.13 ટકા, ઈટરનલ 1.60 ટકા અને કોટક બેન્ક 1.51 ટકા ઉછાળે ટ્રેડ થઈ રહ્યા હતા. જ્યારે ટાટા સ્ટીલ, ઈન્ડિગો, પાવરગ્રીડ, એનટીપીસી, અને બજાજ ફાઈનાન્સ 1 ટકા સુધીના ઘટાડે ટ્રેડ થઈ રહ્યા હતા.

વિદેશી રોકાણકારોની સતત લેવાલી તેમજ વૈશ્વિક સ્તરે ક્રૂડના નીચા ભાવના પગલે ડોલર ઈન્ડેક્સ નબળો પડતાં શેરબજારને વેગ મળ્યો છે. વધુમાં નીચા મથાળે ખરીદી પણ વધી છે.
જિયોજિત ઇન્વેસ્ટમેન્ટ્સ લિમિટેડના ચીફ ઇન્વેસ્ટમેન્ટ સ્ટ્રેટેજિસ્ટ ડૉ. વી. કે. વિજયકુમારે જણાવ્યા પ્રમાણે એફઆઈઆઈ દ્વારા સતત આક્રમક ખરીદીએ ભારતીય બજારમાં સેન્ટિમેન્ટમાં નાટ્યાત્મક પરિવર્તન લાવ્યું છે. છેલ્લા એક મહિનામાં ભારત શ્રેષ્ઠ પ્રદર્શન કરતું મોટું બજાર છે જેમાં 9.4% ના વળતર સાથે અમેરિકા, જાપાન અને દક્ષિણ કોરિયા જેવા અન્ય મોટા બજારોને પાછળ છોડી દેવામાં આવ્યા છે, જેમણે નકારાત્મક વળતર આપ્યું છે. ભારતીય બજારના આ સારા પ્રદર્શનને વધુ એફઆઈઆઈ પ્રવાહ દ્વારા ટેકો મળવાની શક્યતા છે જે ભારતીય બજાર તેજીનો પીછો કરશે.
(Disclaimer: The information provided here is investment advice only. Investing in the markets is subject to risks and please consult your advisor before investing)
(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ/ ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો. વધુમાં અત્રે પ્રગટ થયેલા કોઇપણ સમાચાર કે વિગતો સાથે businessgujarat.in અંશતઃ કે સંપુર્સણપણે સહમત નથી.)
