JP Morganના GBI-EMમાં ભારતના 23 સરકારી બોન્ડ ઈન્ડેક્સ સામેલ, જાણો શું લાભ થશે?

અમદાવાદ, 22 સપ્ટેમ્બરઃ જેપી મોર્ગને પોતાના ગર્વમેન્ટ બોન્ડ ઈન્ડેક્સ-ઈમર્જિંગ માર્કેટ્સ (GBI-EM) ઈન્ડેક્સમાં ભારતનો સમાવેશ કરવાની જાહેરાત કરી છે. જે GBI-EMમાં જૂન-2024થી દેશના 23 ગર્વમેન્ટ બોન્ડ ઈન્ડેક્સ સામેલ કરશે. આ પગલાં સાથે જેપી મોર્ગને વિશ્વની પાંચમી ટોચના અર્થતંત્રમાં અબજો ડોલરના મૂડી પ્રવાહનો માર્ગ મોકળો કર્યો છે.

આ 23 બોન્ડ્સનું સંયુક્ત અંદાજિત મૂલ્ય $33 અબજ છે. જે જીબીઆઈ-ઈએમ ઈન્ડેક્સના કુલ વેલ્યૂમાં 8.7 ટકા સુધી વેઈટેજ ધરાવશે. અર્થાત ભારતનું વેઈટેજ 10 ટકા સુધી વધવાનું જેપી મોર્ગને જણાવ્યું હતું. જેપી મોર્ગનના આ પગલાંને નાણા મંત્રાલય, માર્કેટ નિષ્ણાતોએ આવકાર્યો છે.

JPMorganએ જણાવ્યું હતું કે, 28 જૂન, 2024ના રોજ સ્થાનિક બોન્ડ્સને ઈન્ડેક્સમાં સામેલ કરવાની પ્રક્રિયા શરૂ થશે. આ પ્રક્રિયા 10 માસ સુધી ચાલશે. આ સમયગાળા દરમિયાન, ભારતના ઇન્ડેક્સ વેઇટેજમાં વધારાનો 1 ટકા ગ્રોથ થશે. જે અંતે 10 ટકાની મહત્તમ ફાળવણી સુધી પહોંચશે.

ભારતના ફાઈનાન્સિયલ માર્કેટ માટે શુભ સંકેત

વિદેશી રોકાણ વધશેઃ આ પગલાંથી દેશના અર્થતંત્ર અને વૈશ્વિક રોકાણકારોની સંખ્યામાં વધારો થશે. 28 જૂન, 2024થી આ ઈન્ડેક્સ સામેલ થશે. દેશના ફંડિંગ ખર્ચમાં ઘટાડો કરશે. પરિણામે બોન્ડ્સમાં વિદેશી રોકાણ વધશે.

રૂપિયો મજબૂત બનશેઃ બેન્ક ટ્રેઝરી માર્ક-ટુ-માર્કેટ ગેઈન સાથે રૂપિયો મજબૂત બનશે. કારણ કે G-Secની ખરીદીને કારણે ડોલરમાં રોકાણ પ્રવાહ આવશે. બેન્કો, NBFC, લીવરેજ્ડ કંપનીઓ વગેરે માટે સકારાત્મક છે. આજે રૂપિયો ડોલર સામે ઓફશોર ટ્રેડમાં 0.3 ટકા સુધર્યો હતો.

ડેટ માર્કેટ માટે પોઝિટીવ: FIIની હાજરીમાં વધારો થઇ શકે

જેપી મોર્ગનના બેન્ચમાર્ક ઇમર્જિંગ-માર્કેટ ઇન્ડેક્સમાં ભારતીય સરકારના બોન્ડ ઉમેરવાનો નિર્ણય એ ખૂબ જ અપેક્ષિત ઘટના છે જે દેશના ડેટ માર્કેટ માટે નોંધપાત્ર અસરો ધરાવે છે. ભારતની ઈન્ડેક્સમાં $240 અબજની ફાળવણી અર્થાત 10% ફાળવણી નોંધનીય સ્થાન છે. વાસ્તવમાં, વિદેશી પોર્ટફોલિયો રોકાણકારો (FPIs) આ સમાવેશની અપેક્ષાએ પહેલેથી જ ભારતીય ફિક્સ્ડ ઇન્કમ માર્કેટમાં પ્રવેશી રહ્યા હોવાનું પ્રભુદાસ લીલાધરના એક્ઝિક્યુટીવ ડિરેક્ટર અને સીઈઓ સંદીપ રાઈચુરાએ જણાવ્યું હતું.