NSE અને ગોવા સરકારે BFSI સેક્ટરમાં સ્ટુડન્ટ સ્કીલિંગ પ્રોગ્રામ લોન્ચ કરવા માટે હાથ મિલાવ્યા

ગોવા, 4 MARCH:  નેશનલ સ્ટોક એક્સચેન્જ ઓફ ઈન્ડિયા (NSE) અને ગોવા સરકારે ગોવાના યુવાનોને બેંકિંગ, ફાઇનાન્શિયલ સર્વિસીઝ અને ઇન્શ્યોરન્સ (BFSI) સેક્ટરમાં ઉદ્યોગ સંબંધિત કુશળતાઓથી સજ્જ કરવાના ઉદ્દેશથી સ્ટુડન્ડ સ્કીલિંગ પ્રોગ્રામ લોન્ચ કરવા માટે હાથ મિલાવ્યા છે. બંને એકમો વચ્ચે આ અંગે સમજૂતીપત્ર (એમઓયુ) પર હસ્તાક્ષર કરવામાં આવ્યા હતા જે BFSI સેક્ટરમાં યુવા વર્ગના લોકોને ઉદ્યોગ સંબંધિત કુશળતાઓથી સક્ષમ કરવા અને તેમની નોકરીની તકો વધારવા માટેનું એક મહત્વનું પગલું છે. ગોવા એ યુવા વર્ગને કુશળ બનાવવા માટે NSE સાથે ભાગીદારી કરનારું ઉત્તરાખંડ, મેઘાલય, છત્તીસગઢ અને આસામ પછીનું પાંચમું રાજ્ય બન્યું છે.

ગોવાના સાંક્યુલિમની ગવર્મેન્ટ કોલેજ ઓફ આર્ટ્સ, સાયન્સ એન્ડ કોમર્સ ખાતે યોજાયેલા કાર્યક્રમમાં ગોવા સરકારના ઉચ્ચ શિક્ષણ નિયામક કચેરીના ડિરેક્ટર ભૂષણ કે સવાઇકર અને NSEના ચીફ બિઝનેસ ડેવલપમેન્ટ ઓફિસર શ્રીરામ કૃષ્ણન વચ્ચે આ એમઓયુ કરવામાં આવ્યો હતો જેમાં ગોવાના માનનીય મુખ્ય પ્રધાન ડો. પ્રમોદ સાવંત ઉપસ્થિત રહ્યા હતા.

NSE અને ગોવા રાજ્યે સ્કીલ ડેવલપમેન્ટને પ્રાથમિકતા આપી છે અને કુશળતાના અંતરને ઘટાડવા તથા રાજ્યના યુવા વર્ગ માટે રોજગારીની તકો વધારવા માટે પ્રતિબદ્ધ છે.

સ્ટુડન્ટ સ્કીલિંગ પ્રોગ્રામ બે સ્તરોમાં હાથ ધરવામાં આવશે. લેવલ 1 એ 20 કલાકનો ટ્રેનિંગ પ્રોગ્રામ છે, જે પૂર્ણ થવા પર વિદ્યાર્થીઓને ‘ફાઉન્ડેશન કોર્સ ઈન BFSI’નું પ્રમાણપત્ર આપવામાં આવશે. આનાથી વિદ્યાર્થીઓને વ્યક્તિગત અને વ્યવસાયિક વિકાસ બંને સુનિશ્ચિત કરીને આવશ્યક ફાઈનાન્શિયલ મેનેજમેન્ટ સ્કીલથી સજ્જ કરવામાં આવશે. લેવલ 2 એ 30 કલાકનો અદ્યતન ટ્રેનિંગ પ્રોગ્રામ છે જે વિદ્યાર્થીઓને એનઆઈએસએમ નિયમનકારી પરીક્ષા માટે તૈયાર કરવા માટે બનાવવામાં આવ્યો છે. સફળ ઉમેદવારો દેશવ્યાપી ઉદ્યોગ-માન્યતાપ્રાપ્ત પ્રમાણપત્ર મેળવશે અને કેપિટલ માર્કેટમાં તેમની નોકરીની સંભાવનાઓને વધારશે.

NSEના એમડી અને સીઈઓ આશિષકુમાર ચૌહાણે જણાવ્યું હતું કે ગોવા સરકાર સાથેની આ ભાગીદારી BFSI ક્ષેત્રમાં કૌશલ્યના તફાવતને દૂર કરવાની અમારી પ્રતિબદ્ધતાને દર્શાવે છે. માળખાકીય, ઉચ્ચ ગુણવત્તાવાળી તાલીમ આપીને, અમે ભવિષ્ય માટે તૈયાર અને નાણાંકીય ઉદ્યોગની વિકસતી જરૂરિયાતો સાથે સંલગ્ન હોય તેવા કર્મચારીઓ તૈયાર કરવાનું લક્ષ્ય રાખીએ છીએ.