ઈપીએફઓમાં હવે નિવૃત્તિ પછી એસડબ્લ્યુપી મારફત ફંડ ઉપાડવાની સુવિધા, જાણો કેવી રીતે કામ કરશે?
અમદાવાદ, તા. 19 નવેમ્બર, 2026: કર્મચારી ભવિષ્ય નિધિ સંગઠન (ઈપીએફઓ)એ તેના પ્રોવિડન્ટ ફંડ સબ્સ્ક્રાઈબર્સ માટે નિવૃત્તિ સમયે નડતી આર્થિક ભીડ ઘટાડવા માટે વધુ એક મોટો સુધારો જાહેર કર્યો છે. જેમાં નિવૃત્ત સભ્યો તેમની નિવૃત્તિ સમયની બચત અર્થાત પીએફ એકસામટું ઉપાડવાને બદલે ટૂકડે ટૂકડે એસડબ્લ્યુપી (સિસ્ટેમેટિક વિડ્રોઅલ પ્લાન) હેઠળ ઉપાડી શકશે.
ઈપીએફઓનું આ પગલું તેના રોકાણકારોને નિવૃત્તિ બાદ દરમહિને રકમ ઉપાડવાની સુવિધા આપશે. જે તેમના માસિક ખર્ચાઓને પહોંચી વળવા મદદરૂપ થશે. તેમના જીવનભરની ઈપીએફ બચતમાંથી અન્ય રકમ ખાતામાં જમા રહેશે અને વ્યાજનો લાભ મેળવી શકશે. આ સુવિધા ઈપીએફઓના 55 વર્ષ કે તેથી વધુ વયના 6.3 લાખ સભ્યો માટે ફાયદાકારક બનશે.
આ નવી યોજના કેવી રીતે કામ કરશે?
હપ્તેથી પૈસા ઉપાડવાની સુવિધા: અત્યાર સુધી નિવૃત્તિ પછી આખું ભંડોળ એકસાથે ઉપાડવું પડતું હતું, પરંતુ હવે તમે દર મહિને કે નિશ્ચિત સમયે જરૂરિયાત મુજબના પૈસા ઉપાડી શકશો.
બાકીની રકમ પર વ્યાજ ચાલુ રહેશે: તમે જેટલા પૈસા ઉપાડશો તેટલા જ ખાતામાંથી ઓછા થશે. ખાતામાં પડેલી બાકીની રકમ પર EPFO ના નિયમ મુજબ વ્યાજ મળતું જ રહેશે.
ઉપાડવાના વિવિધ વિકલ્પો: નિવૃત્ત કર્મચારીઓને પૈસા ઉપાડવા માટે અલગ-અલગ વિકલ્પો મળશે:
જમા થયેલી કુલ રકમમાંથી નિયમિત હપ્તા સ્વરૂપે પૈસા લેવા.
શરૂઆતમાં અમુક રકમ એકસાથે ઉપાડી લેવી અને બાકીના પૈસા હપ્તેથી લેવા.
મૂળ રકમ હાથ લગાવ્યા વગર માત્ર તેના પર મળતું વ્યાજ જ નિયમિત ઉપાડવું.
ગમે ત્યારે બહાર નીકળવાની છૂટ: જો ભવિષ્યમાં તમને એકસાથે બધા પૈસાની જરૂર પડે, તો તમે આ પ્લાન બંધ કરીને બાકીની પૂરી રકમ ઉપાડી શકશો.12
નિવૃત્તિ પછી પણ પૈસા જમા કરાવવાની અને અસંગઠિત ક્ષેત્ર માટે નવી તક
આ માળખા હેઠળ નિવૃત્તિ પછી પણ બચત વધારવા માટેના રસ્તા ખોલવામાં આવ્યા છે:
સ્વૈચ્છિક રોકાણ: સભ્યો પગાર ઉપરાંત સીધા પૈસા જમા કરાવીને કે ડિજિટલ પેમેન્ટ દ્વારા અન્ય વ્યક્તિ તરફથી નાની રકમ મેળવીને પણ પોતાનું પીએફ ફંડ વધારી શકશે.
ગિગ વર્કર્સ માટે ફાયદો: ડિલિવરી બોય, ફ્રીલાન્સર્સ અને અસંગઠિત ક્ષેત્રમાં કામ કરતા લોકોને મળતી ટિપ્સ, ભેટ કે છૂટક આવક પણ UAN સાથે જોડાયેલા ડિજિટલ પેમેન્ટ દ્વારા સીધી તેમના પીએફ ખાતામાં જમા થઈ શકશે, જેથી તેમનું ભવિષ્ય પણ સુરક્ષિત બને.
