EDએ ક્રિપ્ટો એક્સચેન્જીસની PMLA હેઠળ રૂ. 907 કરોડની સંપત્તિ જપ્ત કરી

નવી દિલ્હીઃ એન્ફોર્સમેન્ટ ડિરેક્ટોરેટ (ED)એ ક્રિપ્ટો એક્સચેન્જો સામે કડક કાર્યવાહી કરી છે. એજન્સીએ ત્રણ લોકોની ધરપકડ કરતાં ક્રિપ્ટો એક્સચેન્જો દ્વારા મની લોન્ડરિંગ સંબંધિત કેસોમાં રૂ. 907 કરોડની સંપત્તિ જપ્ત કરી છે. નાણા રાજ્ય મંત્રી પંકજ ચૌધરીએ સોમવારે સંસદમાં આ માહિતી આપી હતી. ચૌધરીએ જણાવ્યું હતું કે, સેન્ટ્રલ GST અધિકારીઓએ 12 ક્રિપ્ટો એક્સચેન્જો દ્વારા રૂ. 87.60 કરોડના ગુડ્સ એન્ડ સર્વિસ ટેક્સ (GST)ની ચોરી શોધી કાઢી છે. તેમણે જણાવ્યું કે વ્યાજ અને પેનલ્ટી સહિત 110.97 કરોડ રૂપિયા વસૂલ કરવામાં આવ્યા છે. આઠ કેસમાં વધુ તપાસ ચાલી રહી છે. વ્યાજ અને પેનલ્ટી સાથે ટેક્સની ચૂકવણી કર્યા પછી ચાર કેસ બંધ કરવામાં આવ્યા છે.

વઝીરએક્સની 290 કરોડની સંપત્તિ જપ્ત

ક્રિપ્ટો એક્સચેન્જ ઝનમાઈ લેબ્સ પ્રાઈવેટ લિમિટેડના કેસમાં, જે વઝીરએક્સ તરીકે જાણીતી છે, કંપની અને તેના ડિરેક્ટરોની રૂ. 289.68 કરોડની સંપત્તિ જપ્ત કરવામાં આવી છે. ફોરેન એક્સચેન્જ મેનેજમેન્ટ એક્ટ (ફેમા)ની જોગવાઈઓનું ઉલ્લંઘન કરવા બદલ કંપની અને તેના ડિરેક્ટરો સામે આ કાર્યવાહી કરવામાં આવી છે. લોકસભામાં એક પ્રશ્નના લેખિત જવાબમાં મંત્રીએ કહ્યું કે એન્ફોર્સમેન્ટ ડિરેક્ટોરેટ ક્રિપ્ટો ફ્રોડ સંબંધિત વિવિધ કેસોની તપાસ કરી રહ્યું છે. આમાંથી કેટલાક ક્રિપ્ટો એક્સચેન્જો પણ મની લોન્ડરિંગમાં સામેલ હોવાનું જાણવા મળ્યું છે.

હાલમાં, ભારતમાં ક્રિપ્ટો એસેટ્સ અનિયંત્રિત છે. આ સમયે, વિશ્વભરના ક્રિપ્ટો માર્કેટમાં ઉથલપાથલ જોવા મળી રહી છે. યુએસ ફેડ રિઝર્વની કાર્યવાહીને કારણે વૃદ્ધિની સંભાવનાઓ નબળી પડી છે અને અન્ય જોખમી સંપત્તિની જેમ ક્રિપ્ટો ટોકન્સમાં પણ ઘટાડો જોવા મળ્યો છે.