સોવરિન ગોલ્ડ બોન્ડ સિરિઝ IV સોમવારે ખુલશે, ગ્રામદીઠ રૂ. 6,263ની કિંમતે રોકાણ કરી શકાશે

અમદાવાદ, 10 ફેબ્રુઆરીઃ રિઝર્વ બેન્કના જણાવ્યા અનુસાર સોવરિન ગોલ્ડ બોન્ડનો આગામી ટ્રૅન્ચ સોમવારે પાંચ દિવસ માટે ખુલશે, જેની કિંમત ગ્રામ દીઠ રૂ. 6,263 છે. સોવરિન ગોલ્ડ બોન્ડ સ્કીમ 2023-24 – સિરીઝ IV 12-16 ફેબ્રુઆરી, 2024 દરમિયાન સબસ્ક્રિપ્શન માટે ખુલ્લી રહેશે.

આરબીઆઈએ જણાવ્યું હતું કે, “ગોલ્ડ બોન્ડમાં ગ્રામ દીઠ રૂ. 6,263થી રોકાણ શરૂ કરી શકાશે. કેન્દ્ર સરકારે આરબીઆઈ સાથે પરામર્શ કર્યા બાદ ઓનલાઈન તેમજ ડિજિટલ મોડ મારફત રોકાણ કરતાં રોકાણકારોને નજીવી કિંમત કરતાં ઓછી કિંમતે અર્થાત રૂ. 50 પ્રતિ ગ્રામ ડિસ્કાઉન્ટ આપવાનો નિર્ણય કર્યો છે. આ રોકાણકારો માટે ગોલ્ડ બોન્ડની ઈશ્યૂ પ્રાઈસ રૂ. 6213 પ્રતિ ગ્રામ રહેશે.

શિડ્યુઅલ્ડ કોમર્શિયલ બેન્કો (સ્મોલ ફાઈનાન્સ બેન્કો, પેમેન્ટ બેન્કો અને પ્રાદેશિક ગ્રામીણ બેન્કો સિવાય), સ્ટોક હોલ્ડિંગ કોર્પોરેશન ઓફ ઈન્ડિયા લિમિટેડ (SHCIL), ક્લિયરિંગ કોર્પોરેશન ઓફ ઈન્ડિયા લિમિટેડ (CCIL), નિયુક્ત પોસ્ટ ઓફિસો, નેશનલ સ્ટોક એક્સચેન્જ, અને બોમ્બે સ્ટોક એક્સચેન્જ લિમિટેડ મારફત આ સોવરિન ગોલ્ડ બોન્ડ (SGB)નું વેચાણ કરવામાં આવશે.

ઈન્ડિયા બુલિયન એન્ડ જ્વેલર્સ એસોસિએશન લિમિટેડ (IBJA) દ્વારા સબસ્ક્રિપ્શન સમયગાળા અગાઉના અઠવાડિયાના છેલ્લા ત્રણ કામકાજના દિવસો માટે પ્રકાશિત 999 શુદ્ધતાના સોનાના બંધ ભાવની સરળ સરેરાશના આધારે SGBની કિંમત ભારતીય રૂપિયામાં નક્કી કરવામાં આવે છે.

રોકાણકારોને નજીવા મૂલ્ય પર અર્ધ-વાર્ષિક ગાળામાં વાર્ષિક 2.50 ટકાના નિશ્ચિત દરે રિટર્ન આપવામાં આવે છે. સબ્સ્ક્રિપ્શનની મહત્તમ મર્યાદા વ્યક્તિઓ માટે 4 kg, HUF માટે 4 kg અને ટ્રસ્ટ અને સમાન સંસ્થાઓ માટે 20 kg છે.

SGBની મુદત આઠ વર્ષની રહેશે અને 5માં વર્ષ પછી અકાળે રિડેમ્પશનના વિકલ્પ સાથે વ્યાજ ચૂકવવાપાત્ર હોય તે તારીખે ઉપયોગમાં લેવાશે. રિઝર્વ બેન્ક ઓફ ઈન્ડિયા ભારત સરકાર વતી બોન્ડ જારી કરે છે. બોન્ડનો ઉપયોગ લોન માટે કોલેટરલ તરીકે થઈ શકે છે. KYC ધોરણો ભૌતિક સોનાની ખરીદીને સમાન હશે.

સોવરિન ગોલ્ડ બોન્ડ સ્કીમ નવેમ્બર 2015માં ભૌતિક સોનાની માંગ ઘટાડવા અને સ્થાનિક બચતના એક ભાગ રૂપે સોનાની ખરીદીને સુરક્ષિત કરવાના હેતુ સાથે શરૂ કરવામાં આવી હતી.