હિન્દુજા ગ્રુપ નાદાર રિલાયન્સ કેપિટલ ખરીદશે, NCLTએ મંજૂરી આપી

મુંબઈ, 27 ફેબ્રુઆરીઃ નેશનલ કંપની લો ટ્રિબ્યુનલ (NCLT)એ મંગળવારે નાદાર રિલાયન્સ કેપિટલ લિમિટેડને હસ્તગત કરવા માટે હિન્દુજા ગ્રૂપની કંપની ઇન્ડસઇન્ડ ઇન્ટરનેશનલ હોલ્ડિંગ્સ લિમિટેડ (IIHL)ની દરખાસ્તને મંજૂરી આપી છે. જે લાંબી એક્વિઝિશન પ્રક્રિયામાં નોંધપાત્ર સફળતા છે. ટ્રિબ્યુનલે 11 જાન્યુઆરીના રોજ આ બાબતે પોતાનો નિર્ણય અનામત રાખ્યો હતો, વિગતવાર આદેશ હજુ બાકી છે. ગયા જુલાઇમાં, ઇન્ડસઇન્ડ બેન્કના પ્રમોટર IIHLએ રિલાયન્સ કેપિટલને હસ્તગત કરવા માટે ₹9,861 કરોડની બિડ મૂકી હતી, જેને એડમિનિસ્ટ્રેટર દ્વારા મંજૂર કરવામાં આવી હતી. આ બિડને લેણદારો તરફથી પણ જબરજસ્ત ટેકો મળ્યો, 99% બહુમતી તરફેણમાં મતદાન થયું હતું.

કોર્પોરેટ ઇન્સોલ્વન્સી રિઝોલ્યુશન પ્રોસેસ (CIRP) હેઠળ બિડ સબમિટ કરવા અંગે અમદાવાદ સ્થિત ટોરેન્ટ ઇન્વેસ્ટમેન્ટ્સ સાથે હિંદુજા કાનૂની લડાઈ જારી હતી. ટોરેન્ટ ઇન્વેસ્ટમેન્ટ્સે ડિસેમ્બર 2022માં રિલાયન્સ કેપિટલની નાદારીની હરાજી દરમિયાન ₹8,640 કરોડની ઓફર સાથે બિડિંગનું નેતૃત્વ કર્યું હતું. જોકે, IIHLએ હરાજી પછી ₹9,000 કરોડથી વધુની ઊંચી બિડની દરખાસ્ત કરી હતી, જેનાથી નાદાર પેઢી માટે શ્રેષ્ઠ રિકવરી મૂલ્ય સુનિશ્ચિત કરવા માટે ધિરાણકર્તાઓને બીજી હરાજી અથવા વિસ્તૃત ચેલેન્જ મિકેનિઝમ શરૂ કરવા માટે પ્રોત્સાહિત કરવામાં આવ્યા હતા.

નારાજ ટોરેન્ટે જાન્યુઆરી 2023માં NCLTમાં અપીલ કરી હતી. જેમાં ટોરેન્ટને સમર્થન આપતાં એનસીએલટીએ ચુકાદો આપ્યો હતો કે બીજી હરાજી CIRP ધોરણોનું ઉલ્લંઘન કરે છે.

આ નિર્ણયને ધિરાણકર્તાઓ દ્વારા માર્ચ 2023માં નેશનલ કંપની લો એપેલેટ ટ્રિબ્યુનલમાં વિરોધ કરવામાં આવ્યો હતો, જેણે રિલાયન્સ કેપિટલ પાસેથી વસૂલ કરેલ મૂલ્યને મહત્તમ કરવાનો લક્ષ્યાંક રાખીને બીજી હરાજીને આગળ વધવાની મંજૂરી આપી હતી.

જેના પગલે ઓગસ્ટ 2023માં, ટોરેન્ટ ઇન્વેસ્ટમેન્ટે NCLTને IIHLની સેટલમેન્ટ પ્લાન પર વિચાર કરતા અટકાવવા માટે સુપ્રીમ કોર્ટમાં અપીલ કરી. જો કે, સુપ્રીમ કોર્ટે NCLTની કાર્યવાહીમાં વિક્ષેપ પાડવાનો ઇનકાર કર્યો હતો.

નવેમ્બર 2021માં, રિઝર્વ બેન્ક ઓફ ઈન્ડિયાએ ચૂકવણીમાં ડિફોલ્ટ્સ અને ગંભીર ગવર્નન્સ મુદ્દાઓને ધ્યાનમાં રાખીને રિલાયન્સ કેપિટલના બોર્ડને છોડી દીધું હતું. રિલાયન્સ કેપિટલ પાસે ₹23,666 કરોડથી વધુના દાવા સાથે ₹16,000 કરોડનું સુરક્ષિત દેવું હતું.