સોનું ફરી રૂ. 58000ની ટોચે, ચાંદી કીલોદીઠ રૂ. 69000

અમદાવાદઃ સ્થાનિક બુલિયન માર્કેટમાં હાજરમાં સોનું 10 ગ્રામદીઠ રૂ. 58000ની જૂની સર્વોચ્ચ સપાટીને સ્પર્શી ગયું હતું. જ્યારે ચાંદી રૂ. 69000ની સપાટીએ પહોંચી ગઇ છે. ઉલ્લેખનીય છે કે, 7 ઓગસ્ટે સોનું ઓલટાઈમ હાઈ 58000 અને ચાંદી 73000 થઈ હતી. વૈશ્વિક સ્તરે ફેડ રિઝર્વ દ્વારા વ્યાજદરમાં વધારાની જાહેરાતના પગલે ડોલર ઈન્ડેક્સ સતત મજબૂત બની રહ્યો છે. અમદાવાદ ચોક્સી મહાજનના હેમંત સથવારાએ જણાવ્યું હતું કે, છેલ્લા ઘણા સમયથી સોના-ચાંદીના ભાવમાં મોટાપાયે વોલેટિલિટીના પગલે બન્ને કિંમતી ધાતુઓમાં તેજીનો માહોલ જોવા મળી રહ્યો છે.

2023માં 64,000 સુધી પહોંચી શકે છે કિંમત

આર્થિક અનિશ્ચિતતા વચ્ચે RBI જેવી દુનિયાભરની કેન્દ્રીય બેંકોએ સોનાનો ભંડાર વધાર્યો છે. કેડિયા એડવાઈઝરીના ડાયરેક્ટર અજય કેડિયા અનુસાર, કેન્દ્રીય બેંકોએ સોનાની ખરીદી વધારી, એ સકારાત્મક સંકેત છે. એને કારણે સોનાની કિંમતને સપોર્ટ મળશે. અજય કેડિયાએ કહ્યું હતું કે 2023માં સોનું 64,000 રૂપિયા સુધી પહોંચી શકે છે.

એક વર્ષમાં સોનામાં 16ટકા અને ચાંદીમાં8 ટકા રિટર્ન

સોના-ચાંદી બજાર 2022માં અફરાતફરી વચ્ચે પોઝિટીવ રિટર્ન આપનારુ રહ્યું છે. 3 જાન્યુઆરી, 2022એ સોનું 10 ગ્રામદીઠ રૂ. 50000 અને ચાંદી કિલોદીઠ રૂ. 63500 આસપાસ બોલાઈ રહી હતી. જે આજના બુલિયન માર્કેટ અનુસાર, ચાંદી રૂ. 5500 અને સોનું રૂ. 8000 વધ્યું છે. અર્થાત સોનામાં 16 ટકા અને ચાંદીમાં 8 ટકા રિટર્ન છૂટ્યું છે.