ડોલર સામે રૂપિયો 85 થવાની દહેશત, ડોલર સામે ફોરવર્ડ પ્રિમિયમ દાયકાના તળિયે

નવી દિલ્હી: અમેરિકી ફેડ રિઝર્વ દ્વારા વ્યાજદરમાં 75 બેઝિસ પોઈન્ટનો વધારો થતાં ડોલર સતત નવી ટોચે પહોંચી રહ્યો છે. જેની સામે રૂપિયાનું ફોરવર્ડ પ્રિમિયમ સતત ઘટી દાયકાના તળિયે પહોંચ્યું છે. જેને ધ્યાનમાં રાખતા આયાતકારો આગામી છ માસ માટે હેજમાં વધારો કરી શકે છે. ટ્રેઝરી યીલ્ડમાં ઉછાળાને કારણે આ વર્ષે USD/INR ફોરવર્ડ પ્રીમિયમમાં ઘટાડો થયો છે. ફેડરલ રિઝર્વ દ્વારા આક્રમક દરમાં વધારાને પગલે યુએસ યીલ્ડમાં વધારો થયો છે.

લિક્વિડિટીને અસર કર્યા વિના રૂપિયાની વોલેટિલિટીને મેનેજ કરવાના હેતુ સાથે આરબીઆઈના ફોરવર્ડ ડોલરના વેચાણે કરન્સીના પ્રીમિયમ પર પ્રેશર વધાર્યું છે. 1-વર્ષનો USD/INR પ્રિમિયમ ઘટીને 2.25%ની નજીક પહોંચ્યો છે. જે 2011 બાદના સૌથી નીચા સ્તરે છે. નીચી કિંમતે હેજિંગ કરવા માટેનો સમયગાળો 1થી બે મહિના સુધી વધાર્યા છે.

નિકાસકારો ટૂંકાગાળા માટે હેજિંગ કરી રહ્યા છે

નિકાસકારો આયાતકારોથી વિપરિત ટૂંકાગાળા માટે હેજિંગ કરી રહ્યા છે. ડોલરમાં વધુને વધુ કમાણી કરવાના હેતુ સાથે તેઓ વધુમાં વધુ એક મહિનાનું હેજિંગ કરી રહ્યા છે. રૂપિયાની ટૂંકા ગાળાની ફોરવર્ડ યીલ્ડ હાલમાં લાંબા ગાળાની ઉપજ કરતાં વધુ છે.

રૂપિયો 85 થવાની દહેશત

રૂપિયો આજે ડોલર સામે 31 પૈસા સુધારા સાથે ખૂલ્યો હતો. હાલ 23 પૈસા સુધરી 80.50 પર ટ્રેડેડ હતો. 19 ઓક્ટોબરે ડોલર સામે રૂપિયો 83ના રેકોર્ડ તળિયે પહોંચ્યો હતો. જે હાલ 50 પૈસા સુધી સુધર્યો છે. જો કે, માર્કેટ નિષ્ણાતો ડોલર યિલ્ડની રોજ નવી સર્વોચ્ચ સપાટીને જોતાં રૂપિયો 85 થવાની ભીતિ વ્યક્ત કરી રહ્યા છે.