અમેરિકાની કોર્ટે અદાણી ગ્રુપની અરજી સ્વીકારી: SECના કેસને ફગાવી દેવાની માંગ

અમદાવાદ, 9 એપ્રિલઃ યુએસ સિક્યોરિટીઝ એન્ડ એક્સચેન્જ કમિશન (SEC) દ્વારા દાખલ કરાયેલો છેતરપિંડીનો કેસ રદ કરવા અદાણી ગ્રુપના ચેરમેન ગૌતમ અદાણી અને તેમના ભત્રીજા સાગર અદાણી દ્વારા કરવામાં આવેલી અરજીને યુએસ કોર્ટે મંજૂર કરી છે. કોર્ટે બંને પક્ષોને પ્રી-મોશન કોન્ફરન્સ માટેની તારીખ નક્કી કરવા નિર્દેશ આપ્યો છે. અદાણી જૂથ આગામી ૩૦ એપ્રિલ ના રોજ આ કેસને કાયમ માટે બંધ કરાવવા માટે કોર્ટમાં દલીલો રજૂ કરશે.

યુએસ ડિસ્ટ્રિક્ટ કોર્ટના ઇ મેઇલમાં જણાવાયું છે કે કોર્ટને પ્રતિવાદીઓ તરફથી એક પત્ર મળ્યો છે, જેમાં તેઓએ ફરિયાદને રદ કરવા માટે તેમની પ્રસ્તાવિત “મોશન” દાખલ કરતા પહેલા “પ્રી-મોશન કોન્ફરન્સ” કરવાની વિનંતી કરી હતી. કોર્ટે આ વિનંતીને મંજૂર કરી પક્ષકારોને વાતચીત કરવા અને પ્રી-મોશન કોન્ફરન્સ માટે તારીખ નક્કી કરવા કોર્ટના ડેપ્યુટીનો સંપર્ક કરવાનો નિર્દેશ આપ્યો છે.

અદાણી ગ્રુપે યુ.એસ. સિક્યોરિટીઝ એન્ડ એક્સચેન્જ કમિશન દ્વારા દાખલ કરાયેલા સિક્યોરિટીઝ છેતરપિંડીના મુકદ્દમાને રદ કરવા માટે અપીલ કરી હતી. ૩૦ એપ્રિલે કેસ રદ કરવા માટેની ઔપચારિક અરજી પહેલાં કોર્ટમાં રજૂ કરાયેલી ફાઇલિંગમાં દલીલ કરવામાં આવી હતી કે, આ મામલો યુનાઇટેડ સ્ટેટ્સના અધિકારક્ષેત્રની બહાર છે.

અદાણીની અરજીમાં દલીલ કરવામાં આવી હતી કે ૨૦૨૧માં અદાણી ગ્રીન એનર્જી લિમિટેડ (AGEL) દ્વારા બોન્ડ વેચાણ અંગે SECના દાવાઓમાં ઘણી કાનૂની ખામીઓ છે. આ કેસ માટે કોર્ટ પાસે અધિકારક્ષેત્રનો અભાવ છે, કારણ કે તેમાં રહેલા વ્યક્તિઓએ યુનાઇટેડ સ્ટેટ્સ સાથે સંપર્કો રાખ્યા નથી અને બોન્ડ જારી કરવાની પ્રક્રિયામાં પણ કોઈ સીધી ભૂમિકા ભજવી નથી.

નોંધનીય છે કે નવેમ્બર ૨૦૨૪માં યુએસ સિક્યોરિટીઝ કાયદા હેઠળ દાખલ કરાયેલા કેસમાં, SECએ આરોપ લગાવ્યો હતો કે અદાણીએ ભારતીય સરકારી અધિકારીઓ સાથે સંકળાયેલી કથિત લાંચ યોજના અંગે માહિતી જાહેર કરવામાં નિષ્ફળ રહીને રોકાણકારોને ગેરમાર્ગે દોર્યા હતા.

અદાણીના વકીલોએ દલીલ કરી હતી કે $750 મિલિયન બોન્ડ વેચાણ નિયમન S અનુસાર નિયમ 144A મુક્તિ હેઠળ યુનાઇટેડ સ્ટેટ્સની બહાર કરવામાં આવ્યું હતું. આ પ્રક્રિયા દરમિયાન, સિક્યોરિટીઝ બિન-યુએસ અંડરરાઇટર્સને વેચવામાં આવી હતી, જેમણે તે બાદમાં ખરીદદારોને ફરીથી વેચી દીધા હતા.

આ કેસમાં સૌથી મજબૂત મુદ્દો એ છે કે ૨૦૨૧ના જે બોન્ડ્સ અંગે વિવાદ છે, તેની ૨૦૨૪માં વ્યાજ સાથે પૂરેપૂરી ચુકવણી થઈ ચૂકી છે. જેમાં કોઈ પણ રોકાણકારે એક પણ રૂપિયો ગુમાવ્યો નથી તેવામાં છેતરપિંડીનો આરોપ પાયાવિહોણો છે.

યુ.એસ. સુપ્રીમ કોર્ટના અગાઉના ચુકાદાઓને ટાંકીને, અદાણીના વકીલોએ જણાવ્યું હતું કે SEC યુનાઇટેડ સ્ટેટ્સમાં થયેલા કોઈપણ વ્યવહારના પુરાવા રજૂ કરવામાં નિષ્ફળ ગઈ છે – જે યુ.એસ. કોર્ટમાં કેસની સુનાવણી માટે પૂર્વશરત છે. વધુમાં, SEC એ એવો આરોપ મૂક્યો નથી કે કોઈપણ રોકાણકારને નાણાકીય નુકસાન થયું છે.

અરજીમાં ભારપૂર્વક જણાવાયું છે કે આ મુકદ્દમાનો આધાર બનેલા કથિત લાંચના આરોપોને સમર્થન આપતા કોઈ વિશ્વસનીય આધાર પુરાવાઓ નથી તેથી આ કેસને સંપર્ણપણે રદ્દ કરવામાં આવે.

(Disclaimer: The information provided here is investment advice only. Investing in the markets is subject to risks and please consult your advisor before investing.)

(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ/ ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો. વધુમાં અત્રે પ્રગટ થયેલા કોઇપણ સમાચાર કે વિગતો સાથે businessgujarat.in અંશતઃ કે સંપુર્સણપણે સહમત નથી.)