ફૂડલિંક F&B હોલ્ડિંગ્સે IPO ડ્રાફ્ટ પેપર્સ ફાઇલ કર્યાં

અમદાવાદ, 2 જુલાઇઃ કેટરિંગ અને ફૂડ રિટેઇલ ચેઇન કંપની ફૂડલિંક એફએન્ડબી હોલ્ડિંગ્સ (ઇન્ડિયા)એ પ્રારંભિક જાહેર ભરણા (આઇપીઓ) દ્વારા ભંડોળ ઊભું કરવા માટે મૂડી બજાર નિયામક સેબીમાં પ્રારંભિક પેપર્સ ફાઇલ કર્યાં છે. આ આઇપીઓમાં રૂ. 160 કરોડ સુધીના ઇક્વિટી શેર્સનો ફ્રેશ ઇશ્યૂ તેમજ પ્રમોટર્સ અને ઇન્વેસ્ટર સેલિંગ શેરહોલ્ડર્સ દ્વારા રૂ. 1.19 કરોડથી વધુ શેર્સના ઓફર ફોર સેલ સામેલ છે, તેમ ડ્રાફ્ટ રેડ હેરિંગ પ્રોસ્પેક્ટસ (ડીઆરએચપી)માં જણાવ્યું છે. ઓએફએસના ભાગરૂપે પ્રમોટર્સ અંકિત ચુઘ, ટ્રાન્સ ગ્લોબલ હોટેલ્સ એલએલપી અને સંજય મનોહર વિઝિરાની કંપનીમાં તેમનો હિસ્સો વેચશે.

અર્પિત ખંડેલવાલ, વી’ઓશન ઇન્વેસ્ટમેન્ટ્સ, ઓક્સ એસેટ મેનેજમેન્ટ, આર્કે ઇન્વેસ્ટમેન્ટ્સ, વેલ્સપન ગ્રૂપ માસ્ટર ટ્રસ્ટ તેના ટ્રસ્ટી બાલક્રિષ્ન ગોએન્કા મારફતે, એરન કેપિટલ પાર્ટનર્સ ટી વી મોહનદાસ પાઇ અને રંજન રામદાસ પાઇ તેમજ બોના ટેરા ગ્રીનહાઉસિસ એલએલપી અન્ય રોકાણકારો છે કે જેઓ કંપનીમાં તેમનો હિસ્સો વેચશે.

આ ઉપરાંત કંપની આશરે રૂ. 32 કરોડ ઊભાં કરવા માટે પ્રી-પ્લેસમેન્ટ રાઉન્ડ પણ હાથ ધરી શકે છે. જો આ પ્લેસમેન્ટ થાય તો ફ્રેશ ઇશ્યૂનું કદ ઘટી જશે.

ડીઆરએચપી મૂજબ કંપની ફ્રેશ ઇશ્યૂમાંથી પ્રાપ્ત ભંડોળનો ઉપયોગ બે નવા સેન્ટ્રલાઇડ્ઝ કિચન સ્થાપવા અને તેની મટિરિયલ પેટા કંપની ફૂડલિંક ગ્લોબલ રેસ્ટોરાં એન્ડ કેટરિંગ સર્વિસિસમાં રોકાણ દ્વારા ચાર કેઝ્યુઅલ ડાઇનિંગ રેસ્ટોરાંની સ્થાપના માટે ઉપયોગમાં લેવાની દરખાસ્ત ધરાવે છે.

ભંડોળનો ઉપયોગ દેવાની પુનઃચૂકવણી અને કોર્પોરેટના સામાન્ય હેતુઓ માટે કરાશે. મુંબઇ સ્થિત ફૂડલિંક એફએન્ડબી હોલ્ડિંગ્સ (ઇન્ડિયા) એક ગ્લોબલ લક્ઝરી ફૂડ સર્વિસિસ બિઝનેસ છે, જે વિશિષ્ટ ભોજન અનુભવ પ્રદાન કરવા ઉપર ધ્યાન કેન્દ્રિત કરે છે. કંપનીના શેર્સ બીએસઇ અને એનએસઇ ઉપર લિસ્ટ થવાની દરખાસ્ત છે.

ઇક્વિરસ કેપિટલ અને જેએમ ફાઇનાન્સિયલ બુક રનિંગ લીડ મેનેજર્સ તથા એમયુએફજી ઇનટાઇન ઇન્ડિયા પબ્લિક ઇશ્યૂના રજિસ્ટ્રાર છે.

(Disclaimer: The information provided here is investment advice only. Investing in the markets is subject to risks and please consult your advisor before investing.)

(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ/ ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો.)