ગિફ્ટ સિટીએ IFSCA સાથે ભાગીદારીમાં ભાવિ ફિનટેક લીડર્સ તૈયાર કરવા માટે ‘યંગ બિલ્ડર્સ પ્રોગ્રામ’ શરૂ કર્યો

ટોચના ત્રણ સ્ટાર્ટઅપ્સને આઈએફએસસીએ ફિનટેક સેન્ડબોક્સમાં સીધી એન્ટ્રી મળશે

ગિફ્ટ સિટી, ગાંધીનગર, 22 જુલાઈ, 2026: ગિફ્ટ સિટીએ ઇન્ટરનેશનલ ફાઇનાન્શિયલ સર્વિસિસ સેન્ટર્સ ઓથોરિટી (આઈએફએસસીએ) સાથેની વ્યૂહાત્મક ભાગીદારીમાં ગિફ્ટ ઇન્ટરનેશનલ ફિનટેક ઇનોવેશન હબ (ગિફ્ટ આઈએફઆઈએચ) હેઠળ ‘યંગ બિલ્ડર્સ પ્રોગ્રામ’ શરૂ કરવાની જાહેરાત કરી છે.

આ પહેલનો ઉદ્દેશ્ય આગામી પેઢીના ફિનટેક ઇનોવેટર્સને શોધવા, તેમની પ્રતિભા વિકસાવવા અને તેમને ઝડપી ગતિએ આગળ વધારવાનો છે. આ માટે વિચારના તબક્કાથી લઈને પ્રોટોટાઇપ તૈયાર કરવા, નિયમનકારી મંજૂરી મેળવવા અને સ્ટાર્ટઅપ સ્થાપવા સુધીની સમગ્ર અને સુવ્યવસ્થિત પ્રક્રિયા ઉપલબ્ધ કરાવવામાં આવશે.

આ કાર્યક્રમની શરૂઆત દેશવ્યાપી અરજી પ્રક્રિયાથી થશે. ત્યારબાદ પસંદ કરાયેલા અરજદારો બે દિવસીય ફિનટેક આઇડિયેશન હેકાથોનમાં ભાગ લેશે. હેકાથોનમાંથી પસંદ થયેલી ટીમો ત્યારબાદ ગિફ્ટ આઈએફઆઈએચ ખાતે આઠ સપ્તાહના રેસિડેન્શિયલ પ્રોગ્રામમાં જોડાશે. આ દરમિયાન તેઓ સ્ટાર્ટઅપ સ્થાપકો, ઉદ્યોગ નિષ્ણાંતો, રોકાણકારો, નિયમનકારી સંસ્થાઓના પ્રતિનિધિઓ અને સમગ્ર ઇકોસિસ્ટમના અગ્રણીઓ સાથે નજીકથી કામ કરવાની તક મેળવશે.

નિષ્ણાંતોના માર્ગદર્શન અને પ્રાયોગિક તાલીમ દ્વારા સહભાગીઓને પ્રોડક્ટ ડેવલપમેન્ટ, ડિઝાઇન થિંકિંગ, ગ્રાહકોની જરૂરિયાતોને સમજવી અને તેની ચકાસણી કરવી, બિઝનેસ મોડેલ તૈયાર કરવું તેમજ રોકાણકારો સમક્ષ અસરકારક પ્રેઝન્ટેશન કરવાની તૈયારી જેવા ક્ષેત્રોમાં વ્યવહારુ અનુભવ મળશે. તેના પરિણામે તેઓ પોતાના નવીન વિચારોને બજારમાં રજૂ કરી શકાય એવા અને વિસ્તરણ માટે સક્ષમ વ્યવસાયમાં ફેરવી શકશે.

આ પ્રોગ્રામ હેઠળ ટોચના ત્રણ સ્ટાર્ટઅપ્સને આઈએફએસસીએ ફિનટેક સેન્ડબોક્સમાં વિશેષ સીધી એન્ટ્રી મળશે. તેના દ્વારા તેઓ નિયંત્રિત નિયમનકારી માળખામાં આધુનિક નાણાંકીય નવીનતાઓનું પરીક્ષણ અને માન્યતા મેળવી શકશે. નવીનતા અને નિયમનકારી સહયોગ વચ્ચે સેતુ રચીને આ પહેલ આશાસ્પદ ફિનટેક સ્ટાર્ટઅપ્સને ઝડપથી વ્યાવસાયિક સફળતા તરફ આગળ વધારવા તેમજ ભારતના ઇન્ટરનેશનલ ફાઇનાન્શિયલ સર્વિસીસ સેન્ટર (આઈએફએસસી)માં જવાબદાર અને ભાવિ જરૂરિયાતોને અનુરૂપ નવીનતાની સંસ્કૃતિને પ્રોત્સાહન આપવાનો પ્રયાસ કરશે.

આ કાર્યક્રમ સમગ્ર ભારતના વિદ્યાર્થીઓ, તાજેતરમાં અભ્યાસ પૂર્ણ કરનારા સ્નાતકો, ઉદ્યોગસાહસિક બનવાની ઇચ્છા ધરાવતા યુવાનો અને યુવા ઇનોવેટર્સ માટે ખુલ્લો છે. અરજી કરવાની છેલ્લી તારીખ 16 ઓગસ્ટ, 2026 છે. પસંદ કરાયેલી ટીમો 21 અને 22 ઓગસ્ટ, 2026ના રોજ યોજાનારી ફિનટેક આઇડિયેશન હેકાથોનમાં ભાગ લેશે. ત્યારબાદ 10 ટીમોની પસંદગી કરીને તેમને 1 સપ્ટેમ્બર, 2026થી ગિફ્ટ સિટીમાં શરૂ થનારા રેસિડેન્શિયલ પ્રોગ્રામમાં સામેલ કરવામાં આવશે.

યંગ બિલ્ડર્સ પ્રોગ્રામ માટે ગિફ્ટ આઈએફઆઈએચના રોકાણકારો, ઉદ્યોગ ભાગીદારો અને માર્ગદર્શકોના મજબૂત નેટવર્ક તેમજ પ્રારંભિક તબક્કાની નવીનતાઓને પ્રોત્સાહન આપવાના તેના સફળ અનુભવનો લાભ લેવામાં આવશે. ગિફ્ટ આઈએફઆઈએચની અગાઉની પહેલમાં જોડાયેલા અનેક સ્ટાર્ટઅપ્સ સફળતાપૂર્વક ફિનટેક સેન્ડબોક્સમાં પ્રવેશ મેળવી ચૂક્યા છે, નોંધપાત્ર રોકાણ મેળવ્યું છે અને સતત મળતી ઇકોસિસ્ટમના સહયોગથી પોતાના વ્યવસાયને સફળતાપૂર્વક વિસ્તૃત કર્યો છે.

માર્ગદર્શકો, રોકાણકારો, ઉદ્યોગ અગ્રણીઓ અને નિયમનકારી સંસ્થાઓ સુધી શરૂઆતથી જ પહોંચ ઉપલબ્ધ કરાવીને આ પ્રોગ્રામ ગિફ્ટ સિટીના વૈશ્વિક કક્ષાના ફિનટેક ઇનોવેશન ઇકોસિસ્ટમના નિર્માણના વિઝનને આગળ ધપાવે છે. નવીનતા, પ્રોડક્ટ ડેવલપમેન્ટ અને નિયમનકારી સહયોગના સુમેળ દ્વારા આ કાર્યક્રમ એવા ભવિષ્ય માટે તૈયાર સ્ટાર્ટઅપ્સની મજબૂત શ્રેણી તૈયાર કરવાનો ઉદ્દેશ્ય ધરાવે છે, જે નાણાંકીય સેવા ક્ષેત્રની સતત બદલાતી જરૂરિયાતોને અસરકારક રીતે પૂરી કરી શકે.

(Disclaimer: The information provided here is investment advice only. Investing in the markets is subject to risks and please consult your advisor before investing.)

(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ/ ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો. વધુમાં અત્રે પ્રગટ થયેલા કોઇપણ સમાચાર કે વિગતો સાથે businessgujarat.in અંશતઃ કે સંપુર્સણપણે સહમત નથી.)