અગ્રતાસે સાણંદ બેટરી સુવિધા ખાતે બાંધકામ માઈલસ્ટોન હાંસલ કર્યો, 2027માં ઉત્પાદન માટે સજ્જ

અમદાવાદ, 2 એપ્રિલઃ ટાટા ગ્રૂપની ગ્લોબલ બેટરી બિઝનેસ કંપની, અગ્રતાસ, ગુજરાતના સાણંદ ખાતે તેની સુવિધા પર ઝડપી ગતિએ પ્રગતિ કરી રહી છે. મુખ્ય સ્ટીલ ફ્રેમનું કામ હવે પૂર્ણ થયું છે, જે ઓપરેશનલ તૈયારી તરફનું એક મહત્વપૂર્ણ પગલું છે. અહીં ઉત્પાદન 2027માં શરૂ થવાની અપેક્ષા છે. પૂર્ણ થયેલી સ્ટીલ ફ્રેમ 700 મીટર લંબાઈ, 150 મીટર પહોળાઈ અને સર્વોચ્ચ બિંદુએ 34 મીટર ઊંચાઈ ધરાવે છે. કુલ 105,000 ચોરસ મીટર વિસ્તાર આવરી લેવામાં આવ્યો છે. મુખ્ય માળખામાં 24,000 ટનથી વધુ સ્ટીલનો ઉપયોગ કરવામાં આવ્યો છે, જ્યારે સંબંધિત ઈમારતોનું બાંધકામ સમકક્ષ રીતે આગળ વધી રહ્યું છે. બાંધકામના શિખર સમયે, સાઇટ પર એકસાથે 2,500 કરતાં વધુ કુશળ કર્મચારીઓ કાર્યરત હતા.

આ પ્રોજેક્ટનું અમલીકરણ ટાટા પ્રોજેક્ટ્સ લિમિટેડ દ્વારા, ટાટા કન્સલ્ટિંગ એન્જિનિયર્સ (TCE) અને વિવિધ સ્ટીલ કોન્ટ્રાક્ટર્સ સાથે ભાગીદારીમાં કરવામાં આવી રહ્યું છે. પ્રોજેક્ટમાં ઉપયોગમાં લેવાયેલું તમામ સ્ટીલ અને મોટાભાગની અન્ય સામગ્રી ભારતમાંથી જ મેળવવામાં આવી છે, જે દેશની સપ્લાય ચેઇન અને ઔદ્યોગિક ક્ષમતાને મજબૂત બનાવે છે અને આયાત પરની નિર્ભરતા ઘટાડે છે.

સુધીર ઘાલસાસી, વાઈસ પ્રેસિડેન્ટ – કેપિટલ ડિલિવરી, અગ્રતાસે જણાવ્યું કે,  આ માઈલસ્ટોન સાણંદ ખાતેના પ્રોજેક્ટના વ્યાપ, જટિલતા અને ગતિને દર્શાવે છે. સતત બદલાતી પરિસ્થિતિમાં, વિગતવાર ડિઝાઇનને વાસ્તવિક સ્વરૂપ આપવું અનેક પડકારો સાથે આવે છે. અમારા ભાગીદારો સાથે મળીને, અમે યોજનાઓને વાસ્તવિક પ્રગતિમાં પરિવર્તિત કરી છે અને ભવિષ્ય માટે તૈયાર એવી સુવિધા ઊભી કરી રહ્યા છીએ.

ભારતનું ક્લીન એનર્જી વિઝન અને નેટ ઝીરો 2070

ભારતે 2070 સુધી નેટ ઝીરો ઉત્સર્જન હાંસલ કરવાનો સંકલ્પ લીધો છે અને 2030 સુધી 500 GW નોન-ફોસિલ ફ્યુઅલ એનર્જી ક્ષમતા હાંસલ કરવાનો મહત્ત્વાકાંક્ષી લક્ષ્ય નક્કી કર્યો છે. આ લક્ષ્યો હાંસલ કરવા માટે ઇલેક્ટ્રિક મોબિલિટી અને ગ્રિડ-સ્કેલ એનર્જી સ્ટોરેજમાં ઝડપી વૃદ્ધિ જરૂરી છે, જેને અદ્યતન બેટરી સેલ્સની મજબૂત સ્થાનિક સપ્લાય સપોર્ટ કરશે. પ્રથમ તબક્કામાં દર વર્ષે 20 GWh ક્ષમતાવાળી અગ્રતાસની સાણંદ સુવિધા આ માંગને પૂરી કરવામાં કેન્દ્રસ્થાને રહેશે. કાર્યરત થયા બાદ, અહીં ઇલેક્ટ્રિક વાહનો અને એનર્જી સ્ટોરેજ એપ્લિકેશન્સ માટે અદ્યતન બેટરી સેલ્સનું ઉત્પાદન થશે, જે ફોસિલ ફ્યુઅલ પરની નિર્ભરતા ઘટાડવામાં મદદરૂપ થશે અને ભારતને વૈશ્વિક બેટરી વેલ્યુ ચેઇનમાં મહત્વપૂર્ણ સ્થાન આપશે.

દીપક ખરે, વાઈસ પ્રેસિડેન્ટ – મેન્યુફેકચરિંગ ઓપરેશન્સ, અગ્રતાસે જણાવ્યું કે, સાણંદ ખાતે સ્ટીલ ફ્રેમનું પૂર્ણ થવું ઓપરેશનલ તૈયારી તરફનું એક મહત્વપૂર્ણ પગલું છે. આગળ વધતા, હવે અમારો ધ્યાન સિસ્ટમ્સ, પ્રક્રિયાઓ અને ક્ષમતાઓના વિકાસ પર છે — જેથી ભારતમાંથી વિશ્વ માટે વિશ્વસ્તરીય અને વિશ્વસનીય બેટરીઓનું ઉત્પાદન કરી શકાય. સાથે જ, સુરક્ષિત અને ગુણવત્તાયુક્ત મેન્યુફેકચરિંગ માટે કુશળ વર્કફોર્સનું નિર્માણ પણ અમારી પ્રાથમિકતા છે.

(Disclaimer: The information provided here is investment advice only. Investing in the markets is subject to risks and please consult your advisor before investing.)

(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ/ ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો.)