સ્ટાર્ટઅપ ફન્ડિંગ 33% ઘટ્યું, Q3-2023 બાદ સ્થિતિ સામાન્ય થવાની આશા

નવી દિલ્હી: દેશના સ્ટાર્ટઅપ્સે 2022માં કુલ 24 અબજ ડોલરનું ફન્ડિંગ મેળવ્યું હતું. જે અગાઉના વર્ષ 2021 કરતાં 33 ટકા ઘટાડો દર્શાવે છે. જો કે, કેલેન્ડર વર્ષ 2019 અને 2020ના સંયુક્ત ફન્ડિંગ કરતાં બમણું છે. સીડ ફન્ડિંગ (Early stag) સ્ટાર્ટઅપ્સના કુલ ફન્ડિંગમાં 60થી 62 ટકા હિસ્સો ધરાવે છે. પીડબલ્યુસી ઈન્ડિયાના અહેવાલ મુજબ, સ્ટાર્ટઅપ્સમાં પ્રારંભિક તબક્કાની થતી ડીલ અર્થાત સીડ ફન્ડિંગની સાઈઝ 40 લાખ ડોલર હતી. PwC ઈન્ડિયાના પાર્ટનર-ડીલ્સ અને ઈન્ડિયા સ્ટાર્ટઅપ લીડર અમિત નાવકાએ જણાવ્યું હતું કે, સ્ટાર્ટઅપ્સમાં નોંધપાત્ર રોકાણની રાહ જોઈ રહ્યા છીએ. જે આ વર્ષના બીજા કે ત્રીજા ત્રિમાસિક બાદ ફન્ડિંગની સ્થિતિ સામાન્ય થવાનો સંકેત આપે છે.

સાસ સેગમેન્ટમાં ફન્ડિંગ 20 ટકા વધ્યું

સૉફ્ટવેર-એ-એ-સર્વિસ (SaaS) સેગમેન્ટમાં CY21ની તુલનામાં CY22 દરમિયાન ફન્ડિંગમાં 20 ટકાનો વધારો જોવા મળ્યો હતો અને તે તમામ ફન્ડિંગ પ્રવૃત્તિમાં લગભગ 25 ટકા હિસ્સો ધરાવે છે. 2022માં મૂલ્યની દ્રષ્ટિએ 88 ટકા ફન્ડિંગ ગ્રોથ અને લેઈટ સ્ટેજ ફન્ડિંગ ડીલ્સમાં નોંધાયુ હતું. ગ્રોથ સ્ટેજ ડીલ્સમાં 4.3 કરોડ ડોલર અને લેઈટ સ્ટેજ ડીલ્સમાં 9.4 કરોડ ડોલરની એવરેજ ટીકીટ સાઈઝ હતી. ભારતીય સ્ટાર્ટઅપ્સમાં નોંધાયેલા કુલ રોકાણનો 82 ટકા હિસ્સો બેંગ્લુરૂ, દિલ્હી-એનસીઆર અને મુંબઈના સ્ટાર્ટઅપ્સમાં જોવા મળ્યો હતો. આ શહેરોમાં 28 ટકા સ્ટાર્ટઅપ્સે 2 કરોડ ડોલરથી વધુનું રોકાણ મેળવ્યું હતું.

City-wise start-up funding