INFOSYSનો Q1 નફો 11% વધી રૂ. 5945 કરોડ

મુંબઇ, 20 જુલાઇઃ IT ક્ષેત્રની કંપની ઇન્ફોસિસે જૂન-23ના અંતે પૂરાં થયેલા પ્રથમ ક્વાર્ટરમાં ચોખ્ખા નફામાં 11 ટકાનો ઉછાળો નોંધાવ્યો છે. જોકે, પરીણામના પગલે કંપનીના શેરમાં નકારાત્મક વલણ નોંધાયું હતું અને શેરમાં 2.18 ટકાનો ઘટાડો થયો હતો.

સોફ્ટવેર જાયન્ટ ઈન્ફોસિસે જાહેર કરેલાં ત્રિમાસિક આંકડાઓ અનુસાર, કંપનીનો કોન્સોલિડેટેડ ચોખ્ખો નફો વાર્ષિક ધોરણે લગભગ 11% વધી રૂ. 5,945 કરોડ નોંધાયો છે. વાર્ષિક ધોરણે કોન્સોલિડેટેડ રેવન્યુમાં 10%નો વધારો નોંધાયો છે અને તે વધીને રૂ. 37,933 કરોડ થઈ છે.  વૈશ્વિક પડકારોને પગલે સોફ્ટવેર અગ્રણી ઈન્ફોસિસની આવક હવે સ્થિર ચલણની દ્રષ્ટિએ માત્ર 1-3.5% વધી રહી છે, જે અગાઉ 4.-7% હતી. ભારતના બીજા સૌથી મોટા સોફ્ટવેર સર્વિસીસ નિકાસકારે FY24 માટે તેનું ઓપરેટિંગ માર્જિન ગાઈડન્સ 20-22% જાળવી રાખ્યું છે. ઈન્ફોસિસે વૈશ્વિક મેક્રો ઈકોનોમિક હેડવિન્ડ વચ્ચે બિઝનેસમાં નોંધપાત્ર મંદીને કારણે જૂન ક્વાર્ટર માટે નીચી અનુક્રમિક કમાણી નોંધાવી હતી. કોન્સોલિડેટેડ વેચાણ અનુક્રમે માત્ર 1.3% વધ્યા છે. જ્યારે ચોખ્ખા નફામાં લગભગ 3%નો ઘટાડો થયો છે.
ઇન્ફોસિસના જૂન ક્વાર્ટરના પરિણામોના પગલે, કંપનીના શેરોમાં નકારાત્મક વલણ જોવા મળ્યું હતું, જેના કારણે ગુરુવારે એનએસઇ નિફ્ટીમાં ઇન્ફોસિસના શેર રૂ. 32.20 અથવા 2.18 ટકા ઘટીને રૂ. 1,442.75 પર બંધ થયા હતા.