એરોપોનિક્સથી ગુજરાતમાં કેસરની ખેતીનો નવતર પ્રયોગઃ 100 કિગ્રા ગાંઠમાંથી 500-600 ગ્રામ કેસરની ઊપજ મેળવી

SSIUના બે વર્ષથી કાર્યરત સ્ટાર્ટઅપે માટી કે પાણીનો ઉપયોગ કર્યા વગર ગુજરાતમાં ઉચ્ચ ગુણવત્તાનું કેસર ઉગાડ્યું

અમદાવાદ, 11 નવેમ્બર: સ્વર્ણિમ સ્ટાર્ટઅપ અને ઇનોવેશન યુનિવર્સિટીના સ્વર્ણિમ ઇન્ક્યુબેશન સેન્ટર ખાતે ઇન્ક્યુબેટ થયેલાં ગાંધીનગર સ્થિત સ્ટાર્ટઅપે એરોપોનિક્સની મદદથી એક નવતર પ્રયોગ કરીને ગુજરાતમાં કેસરની ખેતી કરવાની એક નવી પદ્ધતિ સફળતાપૂર્વક વિકસાવી છે.

ઉલ્લેખનીય છે કે, સ્વર્ણિમ સ્ટાર્ટઅપ એન્ડ ઇનોવેશન યુનિવર્સિટી એ ભારતની પ્રથમ યુનિવર્સિટી છે, જે સ્ટાર્ટઅપ્સનું સંવર્ધન કરવા અને પ્રોત્સાહન આપવા માટે સમર્પિત છે. સામાન્ય રીતે ઠંડી આબોહવામાં ઉગતા અને ભારતના કાશ્મીરમાં જોવા મળતાં કેસરને અહીં સફળતાપૂર્વક ઉગાડવામાં આવ્યું છે.

સાહિલ નિનામા અને મયંક ડાભી દ્વારા ડિસેમ્બર 2021માં એરોપોનિક્સ સેફ્રન ફાર્મિંગ નામના સ્ટાર્ટઅપની સ્થાપના કરવામાં આવી હતી. તેને આ વર્ષની શરૂઆતમાં સ્વર્ણિમ સ્ટાર્ટઅપ એન્ડ ઇનોવેશન યુનિવર્સિટીના સ્વર્ણિમ ઇન્ક્યુબેશન સેન્ટર ખાતે ઇન્ક્યુબેટ કરવામાં આવ્યું હતું.

રસપ્રદ વાત તો એ છે કે, આ નવી પદ્ધતિ દ્વારા ઉગાડવામાં આવેલા કેસરની ગુણવત્તા જરાયે ખરાબ થઈ નથી.’ સેફ્રાનલ, ક્રોસિન અને પ્રોક્રોસિન જેવા કન્ટેન્ટની ચકાસણી કરવા કેસરના આ પાકને પ્રોડક્ટ ટેસ્ટિંગ માટે પણ મોકલી આપવામાં આવ્યો છે. આ પદ્ધતિનો ઉપયોગ કરીને કેસરની 100 કિગ્રા ગાંઠમાંથી 500-600 ગ્રામ કેસરની ઊપજ મેળવી શક્યાં હોવાનો તેમણે દાવો કર્યો છે.

એસએસઆઇયુનું વિઝન શિક્ષણ, સંશોધન અને નવીનીકરણ મારફતે વિદ્યાર્થીઓમાં ઉદ્યોગસાહસિકતાની ભાવનાને પ્રોત્સાહન આપવાનો તથા તેમના સર્જનાત્મક દિમાગનો ઉપયોગ કરવા તેમને મદદરૂપ થવાનો તથા ઉન્નત સમાજનું નિર્માણ કરવા માટે નવીનીકરણને વિકસાવવા, પ્રોત્સાહન આપવા અને ઉપયોગ કરવા તેમને સક્ષમ બનાવવાનો છે. અત્યાર સુધીમાં આ સ્ટાર્ટઅપને રૂ. 1.46 લાખનું ફન્ડિંગ પ્રાપ્ત થયું છે, જેમાં રાજ્ય સરકાર અને યુનિવર્સિટીએ કેસરની ખેતી કરવા સંયુક્તપણે યોગદાન આપ્યું છે. આ સ્ટાર્ટઅપનો ઉદ્દેશ્ય કેસરનું ઉત્પાદન વિસ્તારવાનો તથા માર્કેટમાં રીટેઇલમાં વેચવાનો છે.