ઓનલાઇન ગેમિંગ ઇન્ડસ્ટ્રી માટે યોગ્ય કર માળખુ આવકમાં વધારો કરશે

નવી દિલ્હી
ઈન્ટરનેટના વધતાં વ્યાપ તેમજ ઓનલાઈન ગેમિંગ મારફત કમાણીની તકો મળતાં ઓનલાઈન ગેમિંગ ઈન્ડસ્ટ્રી ઝડપથી ગ્રોથ કરી રહી છે. ઓનલાઈન ગેમિંગ ઈન્ડસ્ટ્રી પાસેથી વસૂલવામાં આવતાં જીએસટી અંતર્ગત સરકાર રૂ. 2200 કરોડની આવક કરે છે. પરંતુ જો ઉદ્યોગ માટે યોગ્ય કર માળખુ તૈયાર કરવામાં આવે તો તેની આવકમાં વધારો થવાનો આશાવાદ એક રિપોર્ટમાં વ્યક્ત થયો છે.

જીએસટી ઓન ઓનલાઇન સ્કિલ-બેઝ્ડ ગેમિંગ’ શિર્ષક હેઠળ એસોચેમ અને અન્સર્ટ એન્ડ યંગ (EY)એ તૈયાર કરેલા અહેવાલ પ્રમાણે, આ ઉદ્યોગ હાલમાં પ્લેટફોર્મ ફી અથવા તો ગેમિંગ ઓપરેટ દ્વારા સીધી કમાવાતી ગ્રોસ ગેમિંગ રેવન્યુ (GGR) પર 18 ટકાનાં દરે જીએસટી ચૂકવે છે. 2022માં જીએસટી પેટે રૂ. 2200 કરોડથી વધુ ચૂકવણી કરી હતી.

તદુપરાંત ઓનલાઇન ગેમ્સમાં વિજેતાને મળતી રકમ પર ઇન્કમ ટેક્સ ચૂકવવો પડે છે, જેનાં દ્વારા સરકારી તિજોરીને મોટી આવક થઈ રહી છે. દેશમાં 500 ગેમિંગ કંપનીઓ છે, જેમણે હજારો લોકોને રોજગારી આપી છે.તેમાં 2.7 અબજ ડોલરનું સીધું વિદેશી રોકાણ (FDI) આવ્યું છે. જો કે, ઊંચા કરવેરાને કારણે તેનાં પર અસર પડવાની અને ઓફશોર ઓપરેટર્સ માટે દરવાજા ખુલ્લા થવાની સંભાવના છે.

28 ટકા જીએસટીથી ઈન્ડસ્ટ્રી પર કર બોજો 20 ગણો થશે
જીએસટી કાઉન્સિલનું ગ્રૂપ ઓફ મિનિસ્ટર્સ (GoMs) ઓનલાઇન ગેમિંગ પર જીએસટીની સમીક્ષા કરી રહ્યું છે. ગ્રૂપ ઓફ મિનિસ્ટર્સ પ્રાઇઝ પુલ સહિતની કમ્પ્લીટ કોન્ટેસ્ટ એન્ટ્રી પર 28 ટકા જીએસટી લાદવાની ભલામણ પર વિચારી રહ્યું છે, જેની ઉદ્યોગ પર વિપરીત અસર પડી શકે છે. કોન્ટેસ્ટ એન્ટ્રી પર જીએસટી લાદવાથી આ નવા ઉદ્યોગ પરનો કર બોજો 10થી 20 ગણો વધારશે.

જીએસટી દરખાસ્તથી ઈન્ડસ્ટ્રીનો ગ્રોથ રૂંધાશે
ટેક્સ દર 18 ટકાથી વધારીને 28 કરવાની દરખાસ્ત ઉપરાંત વિજેતા રકમ પર 30 ટકા ઇન્કમ ટેક્સને ધ્યાનમાં લેતાં ઓનલાઇન ગેમિંગ પર કુલ ટેક્સ વધીને 45થી 58 ટકા થાય છે. જીએસટી ટેક્સ દરખાસ્તને કારણે કરવેરો વધી જતો હોવાથી એક્ટિવ યુઝરની સંખ્યામાં ઘટાડો થઈ શકે છે અને સ્થાનિક ગેમિંગ ઈન્ડસ્ટ્રીનો ગ્રોથ અટકી જશે.

આ સેક્ટર એનિમેશન, વિઝ્યુઅલ ઇફેક્ટ્સ, ગેમિંગ અને કોમિક (AVGC) સેક્ટર માટેનાં ભારત સરકારનાં વિઝનને સાકાર કરવામાં મદદ કરી શકે છે. આનાથી સ્થાનિક કંપનીઓને પ્રોત્સાહન મળશે અને યુઝર વિદેશી કંપનીઓ અને ઓફશોર પ્લેટફોર્મથી દૂર રહેશે, જે સરકારની આવકમાં વધારો કરશે. – દીપક સુદે, સેક્રેટરી જનરલ, ASSOCHAM