Go First એરલાઇને દેવાળુ ફૂંક્યું! ફ્લાઇટ્સ રદ કરી, નાદારી માટે અરજી કરી

નવી દિલ્હી, 2 મેઃ વાડિયા ગ્રૂપની માલિકીની ડોમેસ્ટિક એરલાઇન કંપની ગો ફર્સ્ટે નેશનલ કંપની લો ટ્રિબ્યુનલ (NCLT) સમક્ષ સ્વૈચ્છિક નાદારી ઠરાવ (ઈન્સોલવન્સી) કાર્યવાહી માટે અરજી કરી છે. ગો ફર્સ્ટ એરલાઇનના સીઇઓ કૌશિક ખોનાએ આ માહિતી આપી છે. તમને જણાવી દઈએ કે આ પહેલા મંગળવારે એરલાઈન્સે 3 અને 4 મેના રોજ ઉડાન ભરનારી ફ્લાઈટ્સ કેન્સલ કરવાની જાહેરાત કરી હતી.

કંપનીના CEO કૌશિક ખોનાના જણાવ્યા અનુસાર, NCLTમાં નાદારી રિઝોલ્યુશન પ્રક્રિયા માટે અરજી કરી છે. તેમણે કહ્યું કે પ્રૅટ એન્ડ વ્હિટની (P&W) દ્વારા એન્જિનનો સપ્લાય ન થવાને કારણે એરલાઈને અડધાથી વધુ એટલે કે 28 એરક્રાફ્ટ અટકાવી દીધા છે. રિપોર્ટ અનુસાર, CEO કૌશિક ખોનાએ કહ્યું કે એરલાઈને આ ઘટનાક્રમ વિશે સરકારને જાણ કરી છે અને એવિએશન રેગ્યુલેટર ડિરેક્ટોરેટ જનરલ ઓફ સિવિલ એવિએશન (DGCA)ને વિગતવાર રિપોર્ટ પણ સુપરત કરશે.

ગો ફર્સ્ટના કાફલામાં કુલ 30 એરક્રાફટઃ 56 A320neos અને પાંચ A320ceos

31 માર્ચના રોજ GoFirst પાસે 30 એરક્રાફ્ટ હતા, જેમાંથી નવ એરક્રાફ્ટ એવા છે જેમની લીઝની ચૂકવણી બાકી છે. એરલાઇનની વેબસાઇટ અનુસાર, GoFirst પાસે તેના કાફલામાં કુલ 61 એરક્રાફ્ટ છે, જેમાંથી 56 A320neos અને પાંચ A320ceos છે.

મંગળવારે એરલાઈને ઓઈલ માર્કેટિંગ કંપનીઓના બાકી લેણાંને કારણે 3 અને 4 મેની ફ્લાઈટ્સ રદ કરવાની જાહેરાત કરી હતી. પ્રૅટ એન્ડ વ્હિટની તરફથી એન્જિનની સપ્લાય ન થવાને કારણે એરલાઇન તેના અડધાથી વધુ એરક્રાફ્ટને ગ્રાઉન્ડ કરી ચૂકી છે, જેનું મુખ્ય કારણ ભંડોળનો અભાવ છે. ગો-ફર્સ્ટના એરબસ એ320 નિયો એરક્રાફ્ટમાં પ્રેટ એન્ડ વ્હિટનીના એન્જિનનો ઉપયોગ થાય છે.

વાડિયા ગ્રુપની માલિકીની GoFirst એરલાઇન વ્યૂહાત્મક રોકાણકારની શોધમાં છે. આ અંગે સંભવિત રોકાણકારો સાથે વાતચીત ચાલી રહી છે. એરલાઈન કેશ એન્ડ કેરી મોડ પર હોવાનું કહેવાય છે, જેનો અર્થ છે કે તે જેટલી ફ્લાઈટ્સ ચલાવે છે તેના માટે તેણે દૈનિક ચૂકવણી કરવી પડશે. જો પેમેન્ટ નહીં કરવામાં આવે તો વેન્ડર ધંધો બંધ કરી શકે છે તે અંગે સંમતિ આપવામાં આવી છે.