એક્સલસોફ્ટ ટેક્નોલોજીએ રૂ. 700 કરોડના IPO માટે DRHP ફાઇલ કર્યું
અમદાવાદ, 6 માર્ચઃ લર્નિંગ અને એસેસમેન્ટ માર્કેટ ઉપર કેન્દ્રિત વૈશ્વિક વર્ટિકલ SaaS કંપની એક્સલસોફ્ટ ટેક્નોલોજીસ લિમિટેડે પ્રારંભિક જાહેર ભરણા (આઇપીઓ) દ્વારા રૂ. 700 કરોડ એકત્ર કરવા માટે મૂડીબજાર નિયામક સેબી સાથે ડ્રાફ્ટ રેડ હેરિંગ પ્રોસ્પેક્ટસ (ડીઆરએચપી) ફાઇલ કર્યું છે.
ડીઆરએચપી મૂજબ મૈસૂર-સ્થિત કંપનીના પ્રસ્તાવિત આઇપીઓમાં રૂ. 210 કરોડ સુધીના ઇક્વિટી શેર્સનો ફ્રેશ ઇશ્યૂ તથા પ્રમોટર સેલિંગ શેલહોલ્ડર્સ – પેદાંતા ટેક્નોલોજીસ પ્રાઇવેટ લિમિટેડ અને ધનંજય સુધન્વા દ્વારા રૂ. 490 કરોડનો ઓફર ફોર સેલ (ઓએફએસ) સામેલ છે.
એક્સલસોફ્ટ ટેક્નોલોજીસ ફ્રેશ ઇશ્યૂમાંથી પ્રાપ્ત ભંડોળનો ઉપયોગ જમીનની ખરીદી અને નવી બિલ્ડિંગના બાંધકામ માટે મૂડીખર્ચ તથા મૈસૂરમાં તેની વર્તમાન એકમ અને બાહ્ય ઇલેક્ટ્રીકલ સિસ્ટમને અપગ્રેડ કરવા, કંપનીના આઇટી ઇન્ફ્રાસ્ટ્રક્ચર (સોફ્ટવેર, હાર્ડવેર અને કમ્યુનિકેશન એન્ડ નેટવર્ક સર્વિસિસ)ના અપગ્રેડેશન માટે તથા કોર્પોરેટના સામાન્ય હેતુઓ માટે કરવાની દરખાસ્ત ધરાવે છે.
31 ડિસેમ્બર, 2024 સુધીમાં કંપની યુએસએ, યુકે, ભારત, સિંગાપોર, ઓસ્ટ્રેલિયા, જાપાન, મલેશિયા, સાઉદી અરેબિયા, યુએઈ અને કેનેડા સહિત 17 દેશોમાં ફેલાયેલા 71 ક્લાયન્ટ્સને સેવા આપે છે. નાણાકીય વર્ષ 2024માં એક્સલસોફ્ટની કામગીરીમાંથી આવક રૂ. 198.3 કરોડ તથા પીએટી રૂ. 12.75 કરોડ હતો. આનંદ રાઠી એડવાઇઝર્સ લિમિટેડ ઇશ્યૂના બુક રનિંગ લીડ મેનેજર છે. કંપનીના ઇક્વિટી શેર્સ બીએસઇ અને એનએસઇ ઉપર લિસ્ટ કરવાની દરખાસ્ત છે.
(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ/ ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો.)
