પતંજલિના MD બાલકૃષ્ણએ ભ્રામક જાહેરાતો પર સુપ્રિમ કોર્ટની નોટિસ બાદ બિનશરતી માફી માગી

અમદાવાદ, 21 માર્ચઃ પતંજલિ આયુર્વેદ લિમિટેડના મેનેજિંગ ડિરેક્ટર આચાર્ય બાલકૃષ્ણએ 21 માર્ચે કંપનીના ઉત્પાદનોની અસરકારકતા વિશે ભ્રામક જાહેરાતો જારી કરવા અને આધુનિક દવાઓની અસરકારકતા પર પ્રશ્ન ઉઠાવવા બદલ સુપ્રીમ કોર્ટ સમક્ષ બિનશરતી માફી માગી છે. બાલકૃષ્ણ અને કંપનીના કો-ફાઉન્ડર યોગ ગુરુ રામદેવની કંપનીએ તેના ઉત્પાદનો અને તેમની ઔષધીય અસરકારકતાની જાહેરાત કરવા અંગે આપેલા બાંયધરીનું પાલન કરવામાં નિષ્ફળ રહેવા બદલ તિરસ્કારના કેસમાં સુપ્રિમ કોર્ટ દ્વારા સમન્સ મોકલવામાં આવ્યું હતું, જેના બે દિવસ પછી આ માફી માગતું સોગંદનામું રજૂ કરવામાં આવ્યું હતું.

આ સોગંદનામામાં બાલકૃષ્ણએ કહ્યું છે કે, તે કંપનીની જાહેરાત બદલ ખેદ વ્યક્ત કરે છે જેમાં “અપમાનજનક વાક્યો” છે.

આચાર્ય બાલકૃષ્ણએ જણાવ્યું હતું કે તેઓ ખાતરી કરશે કે ભવિષ્યમાં આવી જાહેરાતો જારી કરવામાં ન આવે અને તેનો હેતુ માત્ર આ દેશના નાગરિકોને આયુર્વેદિક કંપની દ્વારા . આયુર્વેદિક સંશોધન દ્વારા પૂરક અને સમર્થિત વર્ષો જૂના સાહિત્ય અને સામગ્રીમાંથી તૈયાર લાઈફસ્ટાઈલ ઉત્પાદનો અને દવાઓનું સેવન કરી સ્વસ્થ જીવન જીવવા માટે પ્રોત્સાહિત કરવાનો છે.

“આ જાહેરાતનો હેતુ માત્ર સામાન્ય નિવેદનો માટે હતો, તેમાં અજાણતાં વાંધાજનક વાક્યોનો સમાવેશ કરવામાં આવ્યો હતો, જેના બદલ ખેદ વ્યક્ત કરીએ છીએ. પતંજલિ આયુર્વેદ વતી જુબાની આપનાર નિવેદનના ભંગ બદલ 21 નવેમ્બર, 2023ના ઓર્ડરને અનુરૂપ આ કોર્ટ સમક્ષ માફી માંગે છે. જુબાની આપનાર ખાતરી કરશે કે ભવિષ્યમાં આવી જાહેરાતો જારી કરવામાં ન આવે,”

જો કે, તેમના સોગંદનામામાં તેમણે એમ પણ કહ્યું કે, “પ્રતિવાદી ( પતંજલિ) પાસે હવે આયુર્વેદમાં કરવામાં આવેલા ક્લિનિકલ સંશોધન સાથે પુરાવા-આધારિત વૈજ્ઞાનિક ડેટા છે, જે 1954ના અધિનિયમની સૂચિમાં ઉલ્લેખિત રોગોના સંદર્ભમાં વૈજ્ઞાનિક સંશોધન દ્વારા કરવામાં આવેલી પ્રગતિ દર્શાવે છે.”

જસ્ટિસ હિમા કોહલી અને અહસાનુદ્દીન અમાનુલ્લાહની બેન્ચે 19 માર્ચના રોજ પ્રથમ દૃષ્ટિએ ઉલ્લંઘન કરવા બદલ તેમની સામે તિરસ્કારની કાર્યવાહી શા માટે શરૂ કરવામાં આવી નથી તે દર્શાવવા અને અગાઉ તેમના દ્વારા જારી કરાયેલી કોર્ટની નોટિસના જવાબો રજૂ કરવામાં કંપની અને બાલકૃષ્ણની નિષ્ફળતાની ટીકા કરતાં ફિટકાર લગાવી હતી.

BSE ખાતે આજે પતંજલિ ફુડ્સના શેર 0.72 ટકા સુધારા સાથે 1368.75 (12.21 વાગ્યે) પર ટ્રેડ થઈ રહ્યા હતા. જેની વાર્ષિક ટોચ 1741 અને બોટમ 870 છે.