WazirXને રાહતઃ ફ્રીઝ કરેલા બેન્ક એકાઉન્ટમાં ફરી ટ્રાન્જેક્શન કરવા મંજૂરી
![](https://businessgujarat.in/wp-content/uploads/2022/09/wazirx-logo-blue.8f74de7a-1024x250.png)
નવી દિલ્હીઃ એન્ફોર્સમેન્ટ ડિરેક્ટોરેટ (ED) એ ક્રિપ્ટોકરન્સી એક્સચેન્જ WazirX ના બેન્ક ખાતામાંથી વ્યવહારો પરનો પ્રતિબંધ હટાવી લીધો છે. કંપનીએ સોમવારે એક બ્લોગ પોસ્ટમાં આ માહિતી આપી હતી. ઓગસ્ટમાં, એજન્સીએ જણાવ્યું હતું કે તેણે WazirXનું સંચાલન કરતી કંપની મેસર્સ ઝનમાઈ લેબ પ્રાઈવેટ લિમિટેડ (M/s Zanmai Lab Pvt Ltd)ના એક ડિરેક્ટરના સ્થાનોની શોધ કરી હતી. જે બાદ એજન્સીએ તેના ખાતા ફ્રીઝ કરી દીધા હતા. EDએ આ કાર્યવાહી 16 ફિનટેક કંપનીઓ અને ઈન્સ્ટન્ટ લોન એપ્સની તપાસના સંદર્ભમાં કરી છે.
WazirX એ બ્લોગપોસ્ટમાં માહિતી આપી છે કે, સંપૂર્ણ આંતરિક તપાસ પછી, WazirXને જાણવા મળ્યું કે ED દ્વારા જે યુઝર્સની માહિતી માંગવામાં આવી હતી, તેઓને 2020-21માં જ WazirX દ્વારા બ્લોક કરવામાં આવ્યા હતા, તેમને શંકાસ્પદ તરીકે ચિહ્નિત કરવામાં આવ્યા હતા.
ક્રિપ્ટો એક્સચેન્જે એમ પણ કહ્યું છે કે વઝિરએક્સના સક્રિય સહકાર અને મની લોન્ડરિંગ સામે કંપની દ્વારા લેવામાં આવેલા પગલાંને કારણે ઇડીએ વઝિરએક્સના બેંક એકાઉન્ટ્સ પરનો પ્રતિબંધ હટાવી લીધો છે. કંપનીએ કહ્યું છે કે વઝીરએક્સ હવે પહેલાની જેમ તેની બેન્કિંગ કામગીરી ચાલુ રાખવાની સ્થિતિમાં છે. એક બ્લોગ પોસ્ટમાં, કંપનીએ કહ્યું છે કે વઝીરએક્સનું કોઈપણ આરોપી ફિનટેક અને ઇન્સ્ટન્ટ લોન એપ સાથે કોઈ જોડાણ નથી. કંપનીએ કહ્યું છે કે કોઈ વૈધાનિક જવાબદારી ન હોવા છતાં, કંપની KYC/એન્ટી-મની-લોન્ડરિંગ પગલાં લે છે. કંપનીએ કહ્યું, વઝીરએક્સ અન્ય કોઈ મધ્યસ્થી જેવું છે જેના પ્લેટફોર્મનો દુરુપયોગ થયો હોઈ શકે છે.