ચાંદી આગામી 12 માસમાં રૂ. 85 હજારની સપાટી ક્રોસ કરશેઃ મોતીલાલ ઓસ્વાલ ફાઇ. સર્વિસિસ

અમદાવાદ, 7 સપ્ટેમ્બરઃ ઈ-મોબિલિટીને પ્રોત્સાહનો મળતાં ઉદ્યોગમાં ચાંદીની માગ સતત વધી રહી છે. બીજી બાજુ રિટેલ ખરીદી પણ પોઝિટીવ જણાતાં આગામી 12 માસમાં ચાંદી કિલોદીઠ રૂ. 85 હજારની સપાટી ક્રોસ કરે તેવી શક્યતા મોતીલાલ ઓસ્વાલ ફાઇનાન્શિયલ સર્વિસિસના રિપોર્ટમાં વ્યક્ત કરવામાં આવી છે.

રિપોર્ટ અનુસાર, 2023ના પ્રથમ ચાર મહિનામાં નોંધપાત્ર સુધારો થયા બાદ ચાંદીમાં ઊંચા ભાવે થોડી અસ્થિરતાનો સામનો કરવો પડ્યો હતો. સ્થાનિક ચાંદીના ભાવમાં દરેક મોટા ઘટાડા પછી ઉપરની બાજુએ રેન્જ શિફ્ટિંગ થતુ હોય છે અને MOFSLને આ વલણ ચાલુ રહેવાની અપેક્ષા રાખે છે. MOFSL અપેક્ષા રાખે છે કે સિલ્વરમાં મોમેન્ટમ તેજીનો રહેવાની સંભાવના સાથે આગામી ક્વાર્ટરમાં વધુ 15% ઉછળી શકે છે.

ચાંદીમાં 70500નો સપોર્ટ

MOFSLએ ₹70,500 પર તાત્કાલિક સપોર્ટ સાથે નીચલા સ્તરેથી ખરીદી કરવા સલાહ આપી છે, જ્યારે મજબૂત મધ્યમ ગાળાનો સપોર્ટ ₹68,000 પર છે. ઉપરની બાજુએ MOFSL આગામી 12 મહિનામાં ₹82,000 અને ત્યારબાદ ₹85,000ના લક્ષ્યાંકિત ભાવ જોઈ શકે છે.

ટ્રેન્ડ

એમસીએક્સ ખાતે 2023ની શરૂઆતમાં, ચાંદીમાં મજબૂત પ્રદર્શન હતું, પ્રથમ ચાર મહિનામાં આશરે 11% નો વધારો થયો હતો અને એકંદરે 6%નો વધારો જાળવી રાખ્યો હતો.

પ્રારંભિક તેજી યુએસ બેંકિંગ અને ડેટ સેક્ટરમાં ચિંતાઓ દ્વારા પ્રેરિત હતી, પરંતુ આ વેગ ફેડરલ રિઝર્વની “હૉકિશ પોઝ” નીતિને કારણે કંઈક અંશે ઘટાડો થયો હતો, જેણે કિંમતી અને ઔદ્યોગિક ધાતુઓ બંનેને અસર કરી હતી.

તેજી રહેવા પાછળનું કારણ

યુ.એસ. કન્ઝ્યુમર પ્રાઈસ ઈન્ડેક્સ (CPI) જુલાઈ 2022માં તેની 9.1%ની ટોચથી નીચે 3.2% થતાં સેન્ટ્રલ બેન્કો વ્યાજદરની નીતિઓનું પુનઃમૂલ્યાંકન કરી રહી છે, જે સંભવિતપણે ફેડ નરમ વલણ દર્શાવે તેવો સંકેત આપે છે. જેનો લાભ કિંમતી ધાતુઓને થશે.

ભૌગોલિક રાજકીય તણાવ રિસ્ક પ્રીમિયમમાં ફાળો આપે છે, ચાંદીના ભાવને ટેકો આપે છે. વધુમાં, ડૉલર ઇન્ડેક્સ લગભગ 99.60થી 104 સુધી ઝડપથી વધ્યો છે. 2023માં યુએસ માટે ફેડની વૃદ્ધિની આગાહી, નરમ ઉતરાણનો સંકેત આપે છે, જે ઔદ્યોગિક ધાતુઓ અને ચાંદી માટે અનુકૂળ છે.

સિલ્વર ઇન્સ્ટિટ્યૂટના ડેટા સૂચવે છે કે બજારનું સંતુલન સતત ત્રીજા વર્ષે ખાધમાં રહી શકે છે, જે ચાંદીના ભાવને વધુ સમર્થન આપે છે. ચીન તરફથી આર્થિક વૃદ્ધિ અને ઔદ્યોગિક માંગ અંગેના સકારાત્મક સંકેતો ચાંદીની કામગીરી માટે સંભવિત તેજી દર્શાવે છે.