ITC Demerger: હોટેલ બિઝનેસને અલગ કરશે, શેર 4%થી વધુ તૂટ્યો

મુંબઇ, 24 જુલાઇઃ રિલાયન્સ ઇન્ડસ્ટ્રીઝમાંથી જિયો ફાઇનાન્સિયલ સર્વિસિસ લિ.ના ડિમર્જર પછી હવે FMCG ક્ષેત્રની દિગ્ગજ કંપની ITCના બોર્ડે હોટેલ બિઝનેસ ડિમર્જર (ITC Hotel Business Demerger News)ના પ્રસ્તાવને મંજૂરી આપી છે. ડિમર્જરની આ યોજના હેઠળ, કંપની પાસે હોટેલ બિઝનેસમાં 40 ટકા હિસ્સો હશે. જ્યારે, બાકીનો હિસ્સો કંપનીના શેરધારકો પાસે રહેશે. ITCએ કહ્યું છે કે 14 ઓગસ્ટ, 2023ના રોજ થનારી બોર્ડ મીટિંગમાં વ્યવસ્થાની યોજનાને મંજૂરી આપવામાં આવશે. આ સંદર્ભે, સેબીના લિસ્ટિંગ નિયમો અને અન્ય સંબંધિત કાયદાઓ હેઠળ યોગ્ય જાહેરાત અને જાહેર માહિતી આપવામાં આવશે.

ITC દ્વારા જારી કરવામાં આવેલી અખબારી યાદી અનુસાર કે બોર્ડને લાગે છે કે એક અલગ એન્ટિટી તરીકે હોટેલ બિઝનેસ મજબૂત ગ્રોથ હાંસલ કરવા માટે સારી સ્થિતિમાં છે. બોર્ડને લાગે છે કે હોટેલ બિઝનેસને ITCની સંસ્થાકીય તાકાત, બ્રાન્ડ ઈક્વિટી અને ગુડવીલનો લાભ મળતો રહેશે. ITC લગભગ 70 સ્થળોએ 120થી વધુ હોટલ ધરાવે છે.

વેલ્યૂ ચેઈનમાં વધારો થશે

ITC લિમિટેડના ચેરમેન સંજીવ પુરીએ જણાવ્યું હતું કે હોસ્પિટાલિટી કેન્દ્રિત કંપનીની રચના ભારતીય હોસ્પિટાલિટી ઉદ્યોગમાં અસ્તિત્વમાં રહેલી જબરદસ્ત તકોનો ઉપયોગ કરીને વૃદ્ધિ અને વેલ્યૂ ચેઈનના આગલા તબક્કાની શરૂઆત કરે છે. સૂચિત પુનઃરચના સાથે, ITC અને નવી કંપની બંનેને સંસ્થાકીય સિનર્જીનો લાભ મળતો રહેશે.

જાહેરાતના પગલે શેરમાં વધુ તેજીનો આશાવાદ

વિશ્લેષકોનું કહેવું છે કે ડિમર્જરને કારણે આ શેરમાં વધુ તેજી જોવા મળી શકે છે. આ શેરમાં આ વર્ષે અત્યાર સુધીમાં 50 ટકાનો ઉછાળો જોવા મળ્યો છે. હોટેલ બિઝનેસ પરનું ઊંચું મૂડીપેક્સ અને પરિણામે સબપાર રિટર્ન હંમેશા વિશ્લેષકો અને રોકાણકારો માટે ચિંતાનો વિષય છે, જેને કંપની વૈકલ્પિક માળખું બનાવીને દૂર કરવા માંગે છે. હોટેલ બિઝનેસે છેલ્લા દાયકામાં ITC રેવન્યુ અને Ebitમાં 5% કરતાં ઓછો ફાળો આપ્યો છે. જો કે, તે કંપનીના મૂડીમાં 20%થી વધુ હિસ્સો ધરાવે છે. વૈવિધ્યસભર સમૂહે તાજેતરમાં નાણાકીય વર્ષ 2022-23 માટે તેનો વાર્ષિક અહેવાલમાં પ્રભાવશાળી નાણાકીય પરિણામો રજૂ કર્યા હતા.

જાહેરાતના પગલે શેર 4 ટકા તૂટ્યો

ડિમર્જર સંબંધિત સમાચાર જાહેર થયા બાદ ITCના શેરમાં ચાર ટકાથી વધુનો ઘટાડો જોવા મળ્યો હતો અને કંપનીનો શેર ઘટીને રૂ. 469.50ના સ્તરે પહોંચી ગયો હતો. આજે શરૂઆતે, દિવસના કારોબાર દરમિયાન, શેરનો ભાવ રૂ. 499.70ના ઉચ્ચ સ્તરે પહોંચ્યો હતો. જે સ્ટૉકની 52 સપ્તાહની ઊંચી સપાટી છે. છેલ્લા છ મહિનામાં આ શેરમાં લગભગ 40 ટકાનો ઉછાળો જોવા મળ્યો છે. બીએસઈ ખાતે 3.87 ટકા તૂટી 470.90 પર બંધ રહ્યો હતો.