કોલ ઈન્ડિયાની પેટા કંપનીના આઈપીઓને મંજૂરી મળતાં શેરમાં તેજી, સાત માસની ટોચે પહોંચ્યા ભાવ

અમદાવાદ, તા. 24 ડિસેમ્બર, 2025: કોલ ઈન્ડિયાનો શેર આજે બીએસઈ ખાતે 412.40ની ઈન્ટ્રા ડે ટોચ સાથે સાત માસની ટોચે પહોંચ્યો હતો. જે સળંગ છઠ્ઠા દિવસે આકર્ષક ઉછાળા સાથે વધ્યો છે. જેમાં મજબૂત ખરીદી નોંધાતા શેર રૂ.417.25 ની તેની 52-સપ્તાહની ટોચની નજીક પહોંચ્યો હતો. છેલ્લા છ સત્રોમાં બ્લુ-ચિપ શેર 8% વધ્યો છે.

કોલ ઇન્ડિયાના શેરમાં તેજી પાછળ શું કારણ છે?

મહારત્ન પીએસયુ શેર કોલ ઇન્ડિયાને તેની પેટાકંપનીઓ – સાઉથ ઇસ્ટર્ન કોલફિલ્ડ્સ લિમિટેડ (SECL) અને મહાનદી કોલફિલ્ડ્સ લિમિટેડ (MCL) ના લિસ્ટિંગ માટે બોર્ડે મંજૂરી આપી છે. આ મંજૂરી મળતાં જ કોલ ઈન્ડિયાના શેરની ડિમાન્ડ વધી છે.

મંગળવારે એક્સચેન્જ ફાઇલિંગમાં કોલ ઇન્ડિયાએ જણાવ્યું હતું કે તેના ડિરેક્ટર બોર્ડે SECL અને MCL ને લિસ્ટેડ થવા માટે મંજૂરી આપી દીધી છે. બંને પેટાકંપનીઓને આપવામાં આવેલી મંજૂરી હવે કોલસા મંત્રાલયને રોકાણ અને જાહેર સંપત્તિ વ્યવસ્થાપન વિભાગ (DIPAM) ને આગળ સબમિટ કરવા માટે મોકલવામાં આવશે. MCL અને SECL ની પ્રસ્તાવિત સૈદ્ધાંતિક સૂચિ વિવિધ નિયમનકારી મંજૂરીઓ પૂર્ણ થવાને આધીન છે.

કોલસા મંત્રાલય દ્વારા કોલ ઇન્ડિયાને આગામી નાણાકીય વર્ષમાં તેની બે પ્રાથમિક પેટાકંપનીઓ – MCL અને SCL ની લિસ્ટિંગ સુનિશ્ચિત કરવા માટે નક્કર પગલાં શરૂ કરવા માટે ચોક્કસ નિર્દેશને અનુસરીને આ નિર્ણય લેવામાં આવ્યો છે.