PKH વેન્ચર્સે પ્રતિસાદના અભાવે IPO પાછો ખેંચ્યો

PKH Ventures IPO Subscription

અમદાવાદ, 5 જુલાઇઃ પીકેએચ વેન્ચર્સે કોઈ ખાસ પ્રતિસાદ ન મળતાં આઈપીઓ પાછો ખેંચ્યો છે. સેબીની ગાઈડલાઈન્સ અનુસાર, આઈપીઓમાં સંસ્થાકીય ખરીદદારોનું 90 ટકા સબ્સ્ક્રિપ્શન હોવુ જરૂરી છે. પરંતુ ક્યુઆઈબી પોર્શન માત્ર 11 ટકા જ સબ્સ્ક્રાઈબ્ડ થતાં કંપની આઈપીઓ પાછો ખેંચવા મજબૂર બની હતી. PKH વેન્ચર્સે લાયકાત ધરાવતા સંસ્થાકીય રોકાણકારોના નબળા પ્રતિસાદને કારણે બિડિંગના અંતિમ દિવસે 4 જુલાઈએ તેનો પબ્લિક ઈશ્યુ પાછો ખેંચવાનો નિર્ણય કર્યો છે. 30 જૂને ખૂલેલા આ પબ્લિક ઈશ્યૂને અંતિમ દિવસે કુલ 65 ટકા જ ભરાયો હતો.

જેમાં હાઈ નેટવર્થ ઈન્વેસ્ટર્સે (NII) અને રિટેલ રોકાણકારોએ 1.67 ગણી અને 99 ટકા બીડ ભર્યા હતા, પરંતુ લાયકાત ધરાવતા સંસ્થાકીય રોકાણકારોએ (QIB) ફાળવેલ ક્વોટાના માત્ર 11 ટકા શેર જ ખરીદ્યા છે. કંપની રૂ. 140થી 148ની ઈશ્યૂ પ્રાઈઝ બેન્ડ પર રૂ. 379 કરોડ એકત્ર કરવા માગતી હતી. જેમાં ફ્રેશ ઈશ્યૂ મારફત રૂ. 270.22 કરોડ અને ઓફર ફોર સેલ હેઠળ 109.13 કરોડ સામેલ હતા. ઓફર ફોર સેલ હેઠળ પ્રમોટર પ્રવિણ કુમાર અગ્રવાલ દ્વારા રૂ. 109.1 કરોડ શેરના વેચાણની ઓફરનો સમાવેશ થતો હતો. કંપનીએ આઈપીઓ પાછો ખેંચતાં ફાઇલિંગમાં જણાવ્યું હતું કે, “ક્વોલિફાઇડ ઇન્સ્ટિટ્યુશનલ બાયર્સ (QIBs) દ્વારા પ્રતિબદ્ધતાને પૂર્ણ ન કરવાને કારણે, ઇશ્યુઅર (PKH) એ હવે BRLMs (બુક રનિંગ લીડ મેનેજર્સ) અને રજિસ્ટ્રાર સાથે પરામર્શ કરીને ઇશ્યૂ પાછો ખેંચવાનો નિર્ણય કર્યો છે.