રિલાયન્સ જિયોનો Q1 નફો 12% વધી 4863 કરોડ, આવક 10% વધી

અમદાવાદ, 21 જુલાઇઃ રિલાયન્સ જિયોએ નાણાકીય વર્ષ 2023-24ના પ્રથમ ક્વાર્ટરમાં આકર્ષક પરિણામો હાંસલ કર્યા છે. ત્રિમાસિક આંકડાઓ અનુસાર, કંપનીના ચોખ્ખા નફામાં 12 ટકાનો વધારો થયો છે. જ્યારે આવકમાં પણ 10 ટકાનો ઉછાળો નોંધાયો છે. મુકેશ અંબાણીની દેશની સૌથી મોટી ટેલિકોમ કંપની Reliance Jioએ જૂન 2023ના રોજ પૂરા થતા ક્વાર્ટરના પરિણામો જાહેર કર્યા છે. જૂન ક્વાર્ટરના ડેટા અનુસાર, કંપનીનો સ્ટેન્ડઅલોન ચોખ્ખો નફો વાર્ષિક ધોરણે 12% વધીને રૂ. 4,863 કરોડ થયો છે. જ્યારે, ઓપરેશનની આવક વાર્ષિક ધોરણે લગભગ 10% વધીને રૂ. 24,042 કરોડ થઈ છે.

જૂન ક્વાર્ટરમાં ટેલિકોમ કંપનીનો કુલ ખર્ચ વધીને રૂ. 17,594 કરોડ થયો છે જે એક વર્ષ અગાઉ રૂ. 16,136 કરોડ હતો. નેટવર્ક ઓપરેટિંગ ખર્ચ એક વર્ષ અગાઉ રૂ. 6,842 કરોડથી વધીને રૂ. 7.379 કરોડ થયો છે. રિલાયન્સ જિયોની લાયસન્સ ફી અથવા સ્પેક્ટ્રમ ફી જૂન ક્વાર્ટરમાં રૂ. 2,204 કરોડ હતી, જે એક વર્ષ અગાઉ રૂ. 2,536 કરોડ હતી. નાણાકીય ખર્ચ એક ક્વાર્ટર અગાઉ રૂ. 1,006 કરોડથી ઘટીને રૂ. 971 કરોડ થયો છે.