લોકડાઊન પછી 46 ટકા યુવાઓના ક્રેડિટ સ્કોરમાં સુધારો નોંધાયો
![](https://businessgujarat.in/wp-content/uploads/2022/09/credit-score-the-Key-to-obtaining-loans.jpg)
ગુજરાતના યુવાનો મજબૂત ક્રેડિટ સ્કોર મામલે દેશમાં બીજા ક્રમે રહ્યાં
અમદાવાદઃ સસ્તા દરે લોન મેળવવા તથા મોટાભાગની પ્રોડક્ટ્સ પર લોન સેવા ઉપલબ્ધ હોવાથી હવે યુવાનો પોતાના ક્રેડિટ સ્કોર પ્રત્યે વધુ સજાગ બની રહ્યા છે. યુવાનોમાં ક્રેડિટ કોન્શિયસનેસ અને સેલ્ફ મોનિટરીંગનાં સંદર્ભમાં કેરળ 726નાં ક્રેડિટ સ્કોર સાથે પ્રથમ ક્રમે રહ્યું હતું. જ્યારે 720નાં સરેરાશ ક્રેડિટ સ્કોર સાથે ગુજરાત, ચંદીગઢ અને દિલ્હી બીજા ક્રમે રહ્યુ હતું. જો કે, 700ની આસપાસનાં ક્રેડિટ સ્કોર સાથે બિહાર અને આસામ યાદીમાં સૌથી નીચે હતા.
ગત નાણાકીય વર્ષમાં 46 ટકા યુવાનોએ પોતાના ક્રેડિટ સ્કોરમાં સુધારો કર્યો છે. જેને જોતાં કહી શકાય કે, યુવાનો અને જનરેશન ઝેડ ગ્રાહકો હવે પોતાની ક્રેડિટ અને મની મેનજમેન્ટ આદતો પ્રત્યે વધુ સભાન બની રહ્યા છે.
‘ક્રેડિટ લિટરસી ઇન્ડેક્સ’ OneScoreના રિપોર્ટ પ્રમાણે, નાણાકીય વર્ષ 2021-22માં 46 ટકાથી વધુ યુવાનો અને જનરેશન ઝેડ યુઝર્સનાં ક્રેડિટ સ્કોરમાં સુધારો થયો હતો. ખાસ કરીને યુવા વર્ગ અને જનરેશન ઝેડ પોતાનાં ક્રેડિટ સ્કોરનું મોનિટરીંગ જાતે કરી રહ્યા છે. વનસ્કોર પ્લેટફોર્મ પર જોવા મળ્યું કે 2020-21માં 48 ટકા યુવાનોએ પોતાનાં ક્રેડિટ સ્કોરનું મોનિટરીંગ કર્યું હતું, જે 2021-22માં વધીને 56.8 ટકા થયું હતું. પોતાનાં ક્રેડિટ સ્કોરનું સક્રિય મોનોટિરીંગ કરતાં જનરેશન ઝેડ ગ્રાહકોનું પ્રમાણ 2020-21માં 7.1 ટકાથી અઢી ગણુ વધી 2021-22માં 19.1 ટકા થઈ હતી. વારંવાર ક્રેડિટ સ્કોરની ચકાસણી કરતા લોકોની સંખ્યા 16 ટકા વધી છે.
83 ટકા યુવાનોએ ક્રેડિટ કાર્ડની સમયસર ચૂકવણી કરી
યુવાનો અને જનરેશન ઝેડમાં ક્રેડિટ કાર્ડ બિલ્સની સમયસર ચૂકવણી અંગે જાગૃતિ વધી રહી છે. 83 ટકાથી વધુ યુવા અને જનરેશન ઝેડ યુઝર્સે ગતવર્ષે સમયસર ચૂકવણી કરી હતી, 2020-21માં તેનું પ્રમાણ 77 ટકા હતું. વનસ્કોર અને વનકાર્ડના સીઇઓ તથા કો-ફાઉન્ડર અનુરાગ સિન્હાએ જણાવ્યું હતું કે, “દેશનાં સૌથી મોટાં વર્કફોર્સમાં સમાવિષ્ટ યુવાનો અને જનરેશન ઝેડ ભારતીય કન્ઝ્યુમર ક્રેડિટમાં મહત્વપૂર્ણ પરિવર્તન લાવી રહ્યા છે. સરળતાથી ધિરાણ અને ખર્ચપાત્ર આવકમાં વધારાને કારણે તેઓમાં સારા ક્રેડિટ સ્કોર અને રિસ્પોન્સિબલ ક્રેડિટ મેનેજમેન્ટ અંગેની જાગૃતિ વધી રહી છે, જેને કારણે તેઓ સરળતાથી પ્રી-એપ્રુવ્ડ લોન, ઓછાં વ્યાજની લોન અને લાંબી મુદતની લોન સરળતાથી મેળવી શકે છે.”