ક્રિપ્ટો માર્કેટમાં તેજી, બિટકોઈન 2023માં 55% સુધરી 26 હજાર ડોલર નજીક

અમદાવાદઃ છેલ્લા એક વર્ષથી ક્રિપ્ટો માર્કેટમાં ચાલી રહેલી મંદી ધીમે-ધીમે દૂર થતી નજરે ચડે છે. ચાલુ કેલેન્ડર વર્ષમાં બિટકોઈન 55 ટકા સુધર્યો છે. જે 30 ડિસેમ્બરના બંધ 16602.59 ડોલર સામે 16 માર્ચના 25858.99 ડોલરે બંધ રહ્યો હતો. ટોચની ક્રિપ્ટો કરન્સી બિટકોઈન ચાલુ કેલેન્ડર વર્ષમાં 17 જાન્યુઆરીથી અત્યારસુધી સતત 20 હજાર ડોલરથી વધુ રહ્યો છે. આજે 5.55 ટકા ઉછાળા સાથે 25854.99 ડોલરે ટ્રેડ થઈ રહ્યો હતો. જે છેલ્લા નવ માસની ટોચે છે.

છેલ્લા એક વર્ષમાં બિટકોઈન 39 ટકા તૂટ્યો: ક્રિપ્ટો માર્કેટ ગતવર્ષે રશિયા-યુક્રેન યુદ્ધ, આર્થિક મંદીની ભીતિ બાદથી સતત મંદીનો સામનો કરી રહ્યું છે. બિટકોઈન 16 માર્ચ, 2022માં 41143.93 ડોલર સામે 39 ટકા તૂટ્યો છે. બિટકોઈન 10 નવેમ્બર, 2021ની ઓલટાઈમ હાઈ 68789.63 ડોલરની તુલનાએ 62.35 ટકા ઘટાડે ટ્રેડ થઈ રહ્યો છે.

ટોચની બીજા ક્રિપ્ટો ઈથેરિયમમાં ત્રણ ટકાનો ઉછાળો જોવા મળ્યો હતો. સોલાના અને પોલકાડોટ જેવા નાના ટોકન્સે પણ તેજી નોંધાવી હતી. શિબા ઈનુ સૌથી વધુ ટ્રેન્ડિંગમાં રહી હતી. વ્યાજદરમાં ઘટાડાના સંકેત પગલે રોકાણકારો અને ટ્રેડર્સ જોખમી એસેટ્સ તરફ ડાયવર્ટ થઈ શકે છે. ક્રિપ્ટો માર્કેટમાં સંસ્થાગત રોકાણકારો દ્વારા રોકાણમાં વૃદ્ધિના પગલે ક્રિપ્ટો માર્કેટમાં ઉછાળો જોવા મળ્યો છે.