સોના-ચાંદીનો ચળકાટ વધ્યોઃ હાજર સોનું રૂ. 58000ની સવા બે વર્ષની ટોચે

અમદાવાદઃ વૈશ્વિક સ્તરે ફેડ રિઝર્વના હોકિશ વલણના કારણે કિંમતી ધાતુ બજારમાં અફરાતફરી સતત વધી રહી છે. અમદાવાદ ખાતે આજે હાજરમાં સોનું 10 ગ્રામદીઠ રૂ. 200 વધી સવા બે વર્ષની ટોચે 58000ની સપાટીએ પહોંચ્યું હતું. જ્યારે ચાંદી કિલોદીઠ રૂ. 1500 વધી 67500 થઈ હતી. અગાઉ 4 ઓગસ્ટે સોનુ 55700 અને ચાંદી 64500 થઈ હતી. જો કે, હજી સોનુ અને ચાંદી તેના 7 ઓગસ્ટના હાઈથી ક્રમશઃ રૂ. 2000 અને રૂ. 5500 દૂર છે. 7 ઓગસ્ટે સોનું ઓલટાઈમ હાઈ 58000 અને ચાંદી 73000 થઈ હતી. વૈશ્વિક સ્તરે ફેડ રિઝર્વ દ્વારા વ્યાજદરમાં વધારાની જાહેરાતના પગલે ડોલર ઈન્ડેક્સ સતત મજબૂત બની રહ્યો છે. જ્યારે બીજી બાજુ ચીનમાં ફરી પાછો કોરોના વકર્યો છે. જેની અસર સોના-ચાંદી બજાર પર જોવા મળી છે. ઉલ્લેખનીય છે કે, અમદાવાદ ચોક્સી મહાજનના હેમંત સથવારાએ જણાવ્યું હતું કે, છેલ્લા ઘણા સમયથી સોના-ચાંદીના ભાવમાં મોટાપાયે વોલેટિલિટીના પગલે ઘરાકીમાં ઘટાડો થયો છે. હાલ કમોરતાની અસર પણ બુલિયન બજારમાં જોવા મળી છે. વૈશ્વિક સ્તરે વેકેશનના માહોલ પૂર્ણ થયા બાદ નવા વર્ષમાં બજારનું સ્પષ્ટ ચિત્ર જાણી શકાશે.

2022: સોનામાં 12 ટકા અને ચાંદીમાં 6 ટકા રિટર્ન

સોના-ચાંદી બજાર 2022માં અફરાતફરી વચ્ચે પોઝિટીવ રિટર્ન આપનારુ રહ્યું છે. 3 જાન્યુઆરીએ સોનું 10 ગ્રામદીઠ રૂ. 50000 અને ચાંદી કિલોદીઠ રૂ. 63500 આસપાસ બોલાઈ રહી હતી. જે આજના બુલિયન માર્કેટ અનુસાર, ચાંદી રૂ. 4000 અને સોનું રૂ. 6000 વધ્યું છે. અર્થાત સોનામાં 12 ટકા અને ચાંદીમાં 6 ટકા રિટર્ન છૂટ્યું છે.

વૈશ્વિક સ્તરે સુધારો

વૈશ્વિક સ્તરે સોનું ઔંશદીઠ 2.10 ડોલર વધી 1827.30 ડોલર પર ટ્રેડેડ હતું. રોકાણકારો જીડીપી આંકડાઓ અને ડોલરની ચાલ પર હાલ નજર રાખી રહ્યા છે. કોવિડના કેસોમાં વધારાને પગલે આગામી સમયમાં ખાસ કરીને 25 ડિસેમ્બરથી ક્રિસમસ વેકેશન બાદ સોના-ચાંદી બજારમાં સુધારોનો માહોલ જળવાઈ રહેવાની શક્યતા સાથે હાલ ખરીદી વધી શકે છે. વૈશ્વિક સ્તરે સોનું સપ્ટેમબર, 2020થી અત્યારસુધીમાં 200 ડોલરથી વધુ વધી ચૂક્યું છે.