MARKET MONITOR: સતત સાત દિવસના સુધારા પછી નિફ્ટી-સેન્સેક્સમાં પોણાટકાની પીછેહટ

અમદાવાદ, 27 માર્ચઃ સતત સાત દિવસની તેજી પછી મંગળવારે બુધવારે સેન્સેક્સ 728 પોઈન્ટ્સ, 0.93% ઘટીને 77288 અને  નિફ્ટી 181ના લોસે, 0.77% ગુમાવી 23486 બંધ હતા. અન્ય ઇન્ડેક્સો  પણ સેન્સેક્સ-નિફ્ટીના ટ્રેન્ડને ફોલો કરતાં  નિફ્ટી બેંક 399 પોઈન્ટ્સ, 0.77% ઘટીને 51,209 પર અને નિફ્ટી ફાયેનેન્સીયલ સર્વીસીસ એક ટકો તૂટી 24829 તેમ જ નિફ્ટી નેક્સ્ટ 50 ઇન્ડેક્સ 242પોઇન્ટ્સ, 0.39%ના લોસે 62460ના લેવલે વિરમ્યા હતા.  મિડકેપ સિલેક્ટ 0.63% ઘટી 11502 પર આવી ગયો હતો. માર્કેટ બ્રેડ્થ ઘટાડાની તરફેણ કરતી હતી. 1:4 એડવાન્સ-ડિકલાઇન રેશિયો હતો, મતલબ કે એક શેર વધ્યો એની સામે ચાર શેરો ઘટ્યા હતા. નિફ્ટીના 50 માંથી 40, નિફ્ટી નેક્સ્ટ ફિફ્ટીના 50માંથી 34, નિફ્ટી બેન્કના 12માંથી 10, નિફ્ટી ફાયેનેન્શ્યલ સર્વીસીસના 20માંથી 19 અને નિફ્ટી મિડકેપ સિલેક્ટના 25માંથી 19  શેરો લાલ નિશાનમાં બંધ થયા હતા.

સેન્સેક્સ પ્રતિનિધિ ઇન્ડસઇન્ડ બેંક ત્રણ ટકા સુધરી રૂ. 656, એચસીએલ ટેક્નોલોજીસ અડધો ટકો વધી રૂ. 1633, ભારતી એરટેલ 0.22%ના ગેઇને રૂ. 1737, મહિન્દ્રા એન્ડ મહિન્દ્રા પા ટકો વધી રૂ. 2742 અને ટાઇટન 0.07%ના નજીવા સુધારા સાથે ગેઇનર્સની યાદીમાં હતા. સામે પક્ષે  એનટીપીસી સાડા ત્રણ ટકા ડાઇન થઇ રૂ. 354, ટેક મહિન્દ્રા 2.85%ના નુક્શાને રૂ. 1415, બજાજ ફાયેનાન્સ સવા બે ટકાના લોસે રૂ. 8864, ઇન્ફોસિસ બે ટકા તૂટી રૂ. 1598, એક્સિસ બેંક સવા બે ટકાના લોસે રૂ. 1095 અને ઝોમેટો 3.10%ના નુક્શાને રૂ. 203 બંધ રહી ઘટવામાં ટોપ પર હતા. સેક્ટરવાઇસ મિડીયા ઇન્ડેક્સમાં અઢી ટકાનો, કેપીટલ માર્કેટ ઇન્ડેક્સમાં પોણા બે ટકાનો, ઓઇલ એન્ડ ગેસમાં 1.36%નો, નિફ્ટી પીએસઇમાં 1.34%નો અને નિફ્ટી રિયલ્ટીમાં સવા ટકાનો ઘટાડો જોવા મળ્યો હતો. આઇટી હેવીવેઇટ ટેક મહિન્દ્રા અને ઇન્ફોસિસમાં પુરોગામી સત્રનો સુધારો ધોવાઇ ગયો હતો. પીએસયુ શેરોએ નવેસરથી વેચવાલીનો સામનો કરવો પડ્યો હતો.

પીએસયુ બેન્ક ઇન્ડેક્સના બારે બાર શેરો ઘટીને બંધ રહ્યા એમાં પંજાબ એન્ડ સિંધ બેન્ક પોણાપાંચ ટકા તૂટી રૂ. 44.50 થઇ ગયો હતો. નિફ્ટીના સીપ્લા અઢી ટકાના ઘટાડે રૂ. 1473  અને બીપીસીએલ બે ટકાના લોસે રૂ. 273 બંધ હતા. ઇન્ડસઇન્ડ બેંકે ડાઉનવર્ડ ટ્રેન્ડને ખાળીને 3.34% વધીને રૂ. 658 બંધ રહી ટોચના નિફ્ટી ગેઇનરનું સ્થાન પ્રાપ્ત કર્યું હતુ. અશોક લેલેન્ડ તેની બોર્ડ મીટિંગ પહેલા 2% વધીને રૂ. 214 બંધ થયો હતો. બોફા સિક્યોરિટીઝે ડાઉનગ્રેડ કર્યાં પછી ઝોમેટો અઢી ટકા વધુ ઘટી રૂ. 204 અને સ્વિગી વધુ ચાર ટકા તૂટી રૂ. 324 થઇ ગયા હતા. મિડકેપ સેગમેન્ટમાં, મેક્સ હેલ્થકેર –4.16% રૂ. 1124, આરઇસી-2.99% રૂ. 426, હુડ્કો -3.63% રૂ. 196, કન્ટેનર કોર્પોરેશન -3.74% રૂ. 685 અને અરબિંદો ફાર્મા -3.24% રૂ. 1156 નું પ્રદર્શન સૌથી ખરાબ હતું. કેન્દ્રીય રોડ મંત્રાલયના એડવાન્સ્ડ બ્રેકિંગ સિસ્ટમ્સ પરના નિર્દેશ પછી, ઝેડ એફ કોમર્શિયલનો શેર 5.77%  ઉછાળી રૂ. 12690ના સ્તરે બંધ થયો હતો. એનસીએલટી દ્વારા ઊર્જા વ્યવસાયના ડિમર્જર માટે મંજૂરી મળ્યાના પગલે સિમેન્સ 5.68%  વધી રૂ. 5409 બંધ હતો. બીએસએનએલ તરફથી ₹10,800 કરોડનો ઓર્ડર મળતાં એનસીસી  1.65% વધી રૂ. 208ના સ્તરે વિરમ્યો  હતો. એનએસઇના 124માંથી બાકીના 102 ઇન્ડેક્સો ઘટ્યા હતા. એનએસઇ ખાતે 2985 ટ્રેડેટ શેરોમાંથી 2303 ઘટીને બંધ રહ્યા હતા. તે જ રીતે બાવન સપ્તાહના નવા હાઇ 23 ની તુલનાએ નવા લોની સંખ્યા 187 અને ઉપલી સર્કીટે 62 શેરોની સામે નીચલી સર્કીટે 180 શેરો પહોંચ્યા હોવાથી બ્રોડર માર્કેટ ખરાબ થયું હોવાની પ્રતીતી થતી હતી.

નિફ્ટી પ્રીવીયસ ક્લોઝ 23668 સામે 23700 ખુલી , વધીને 23736 અને ઘટીને 23451 થયા બાદ છેલ્લે માત્ર 181 પોઇન્ટ્સ, 0.77% તૂટી 23486ના સ્તરે બંધ હતો. આ ઇન્ડેક્સના બાવન સપ્તાહની ઊચ્ચ સપાટીથી 2% સુધીના ડીસ્ટન્સ પર બંધ રહેલા શેરોમાં બજાજ ફિનસર્વ રૂ. 1935, બજાજ ફાયેનાન્સ રૂ. 8870, ભારતી એરટેલ રૂ. 1733, આઇશર મોટર્સ રૂ. 5398, એચડીએફસી બેન્ક રૂ. 1803, ICICI બેન્ક રૂ. 1335, JSW સ્ટીલ રૂ. 1053 અને કોટક બેન્ક રૂ. 2148 નો સમાવેશ થાય છે. સામે પક્ષે બજાર આટલું સુધર્યું હોવા છતાં બાવન સપ્તાહના બોટમેથી બે ટકાની રેન્જમાં હોય એવા નિફ્ટી શેરોની યાદીમાં આઇટીસી રૂ. 407.40 અને ટાઇટન રૂ. 3060 આવે છે.

કેવાયસી ધોરણોના ભંગ બદલ રિઝર્વ બેન્કની HDFC બેન્કને પેનલ્ટી

રિઝર્વ બેંકે HDFC બેંક પર ₹75 લાખનો નાણાકીય દંડ ફટકાર્યો છે. બેંકે તમારા ગ્રાહકોને ઓળખો (KYC) માર્ગદર્શિકાનું પાલન ન કર્યું હોવાથી આ દંડ કરાયો છે. આરબીઆઇએ ગ્રાહક જોખમ વર્ગીકરણમાં ખામીઓ અને અનન્ય ગ્રાહક ઓળખ કોડ (UCIC) ને બદલે બહુવિધ ગ્રાહક ઓળખ કોડ (CIC) જારી કરવાની નોંધ લીધા પછી આ પગલું લીધું છે. RBI ની કાર્યવાહી 31 માર્ચ, 2023 ના રોજની HDFC બેંકની નાણાકીય સ્થિતિના આધારે હાથ ધરવામાં આવેલા સ્ટેચ્યુટરી ઇન્સ્પેક્શન પછી કરવામાં આવી છે.

નિયમનકારે શોધી કાઢ્યું કે એચડીએફસી બેંક ગ્રાહકોને નીચા, મધ્યમ અને ઉચ્ચ-જોખમવાળા વિભાગોમાં વર્ગીકૃત કરવામાં નિષ્ફળ ગઇ છે, જે KYC નિયમો હેઠળ એક મુખ્ય આવશ્યકતા છે. તદુપરાંત અન્ય  કાર્યવાહીમાં, RBI એ KLM Axiva Finvest નામની એક નોન-ડિપોઝિટ-ટેકિંગ મિડલ લેયર NBFC ને ₹10 લાખનો દંડ પણ ફટકાર્યો છે. કંપનીએ NBFC સ્કેલ-આધારિત નિયમન માળખાનું ઉલ્લંઘન કર્યું અને  છેલ્લા ત્રણ નાણાકીય વર્ષોમાં લઘુત્તમ વિવેકપૂર્ણ આવશ્યકતાઓને પૂર્ણ કરવામાં પણ નિષ્ફળ રહેવા છતાં નાણાકીય વર્ષ 2024 માટે એણે ડિવિડન્ડ જાહેર કર્યું હોવાના કારણે આરબીઆઇએ પગલાં લીધા છે.

માર્કેટ કેપીટલાઇઝેશનમાં રૂ. 3 લાખ કરોડનો ઘટાડો

એનએસઇ લીસ્ટેડ શેરોનું માર્કેટ કેપીટલાઇઝેશન રૂ. 409.08(412.35) લાખ કરોડ અને બીએસઇ લીસ્ટેડ શેરોનું રૂ. 411.62(414.95) લાખ કરોડ થતાં બુધવારે રોકાણકારોની સંપત્તિમાં રૂ. 3 લાખ કરોડનો ઘટાડો થયો હતો.

FII લેવાલ, ડીઆઇઆઇ વેચવાલ

બુધવારે એફઆઇઆઇની રૂ. 2240 કરોડની નેટ લેવાલી સામે ડીઆઇઆઇની નેટ  રૂ. 696 કરોડની વેચવાલી રહેતાં કેશ સેગ્મન્ટમાં એકંદરે રૂ. 1545 કરોડની નેટ લેવાલી જોવા મળી હતી.