મ્યુચ્યુઅલ ફંડ ફોલિયોની સંખ્યા ડિસેમ્બરમાં 17 ટકા વધી 14.11 કરોડની રેકોર્ડ ટોચે

SIP રોકાણ ડિસેમ્બર-2021ની તુલનાએ આ વર્ષે ડિસેમ્બરમાં 20 ટકા વધ્યું

અમદાવાદ: ભારતીય શેરબજારોની વોલેટિલિટી વચ્ચે મ્યુચ્યુઅલ ફંડ્સમાં રોકાણ સતત વધી રહ્યું છે. ડિસેમ્બર મહિનામાં મ્યુચ્યુઅલ ફંડ ફોલિયોની સંખ્યા વધી રેકોર્ડ 14,11,19,590ની રેકોર્ડ ટોચે પહોંચી હતી. જે ગતવર્ષે 12.02ની તુલનાએ 17.38 ટકા વધ્યુ છે. રિટેલ મ્યુચ્યુઅલ ફંડ ફોલિયો પણ રેકોર્ડ 11.29 કરોડ નોંધાયા હતા. એમ્ફી (AMFI)ના આંકડાઓ અનુસાર, ડિસેમ્બરમાં મ્યુચ્યુઅલ ફંડ ઈન્ડસ્ટ્રીની નેટ એયુએમ વધી રૂ. 39,88,735.37 કરોડ થઈ હતી. AAUM પણ વધી 40,76,170.53 કરોડ રહી હતી. SIP રોકાણ ડિસેમ્બર-21 સામે ડિસેમ્બર, 2022માં 20 ટકા વધી રૂ. 13573.08 કરોડ નોંધાયુ હતુ. જે નવેમ્બરમાં 13306.49 કરોડ હતું.

ડિસેમ્બરમાં 23 લાખ નવા SIP ખૂલ્યાં

ડિસેમ્બરમાં 7,85,102 નવા SIP એકાઉન્ટ સાથે કુલ 6.12 કરોડ SIP એકાઉન્ટ રજિસ્ટર્ડ છે. SIPની એયુએમ વધી રૂ. 674666.32 નોંધાઈ હતી. જે નવેમ્બરમાં 6.83 લાખ કરતાં ઘટી હતી. ડિસેમ્બરમાં 23,24,070 SIP નવા ખૂલ્યાં હતા.

–    36 સ્કીમ્સ લોન્ચ થઈ હતી. જેમાંથી 24 ઓપન એન્ડેડ અને 12 ક્લોઝ એન્ડેડ હતી

–    નવી સ્કીમ્સમાં રૂ. 8486 કરોડનું ફંડ્સ જમા થયું ડિસેમ્બરમાં

–    21455.35 કરોડનું ગોલ્ડ ઈટીએફ નોંધાયું

મ્યુચ્યુઅલ ફંડ ફોલિયો છેલ્લા ત્રણ મહિનાથી સતત નવા માઈલસ્ટોન પાર કરી રહ્યા છે. રિટેલ અને નાના રોકાણકારો તંદુરસ્ત અને શિસ્તબદ્ધ રોકાણની આદત સાથે સિસ્ટેમેટિક રોકાણ વધારી રહ્યા છે. નવેમ્બર 2022ના મહિનામાં રૂ. 8,601.73 કરોડની સરખામણીએ ઇન્ડેક્સ ફંડ્સમાં ડિસેમ્બરમાં રૂ. 6,736.52 કરોડનો નેટ પ્રવાહ દર્શાવ્યો છે.

“રોકાણકારો નજીકના ભવિષ્યમાં મ્યુચ્યુઅલ ફંડના માધ્યમથી રોકાણ જારી રાખશે. હાલ, રોકાણકારો વિકાસલક્ષી બજેટની રાહ જોઈ રહ્યા છે જેની બજારો પર સકારાત્મક અસર થવી જોઈએ. ઈક્વિટી માર્કેટની સાથે સાથે રોકાણકારો લાંબા ગાળાના લક્ષ્યાંકો પૂર્ણ કરવા SIPમાં રોકાણ વધારી રહ્યા છે. નિયમિત રોકાણ શિસ્તબદ્ધ આદત બનાવવા માટે SIP એ સૌથી સરળ માર્ગ છે.” – એન.એસ. વેંકટેશ, ચીફ એક્ઝિક્યુટીવ, AMFI