પેપ્સીકો ઈન્ડિયા મધ્યપ્રદેશમાં ફ્લેવર મેન્યુફેક્ચરિંગ સુવિધા માટે રૂ. 1266 કરોડનું રોકાણ કરશે

નવી દિલ્હી, 2 એપ્રિલઃ પેપ્સિકો ઇન્ડિયાએ દેશમાં તેની વિસ્તરણ યોજનાના ભાગરૂપે મધ્યપ્રદેશના ઉજ્જૈન ખાતે ફ્લેવર મેન્યુફેક્ચરિંગ ફેસિલિટી સ્થાપવા માટે રૂ. 1,266 કરોડનું રોકાણ કરવાની જાહેરાત કરી છે. કંપનીએ એક નિવેદનમાં જણાવ્યું હતું કે 22 એકરમાં ફેલાયેલો પ્લાન્ટ ભારતમાં પેપ્સિકોના પીણાંના ઉત્પાદનને વધારવામાં, રોજગારીનું સર્જન કરવામાં અને સ્થાનિક અર્થતંત્રને સકારાત્મક અસર કરવામાં મહત્વની ભૂમિકા ભજવશે. આગામી પ્લાન્ટનું બાંધકામ 2024માં શરૂ થવાની ધારણા છે અને 2026ના પ્રથમ ત્રિમાસિક ગાળામાં શરૂ થવાની ધારણા છે.

પેપ્સિકો ઈન્ડિયા અને સાઉથ એશિયાના સીઈઓ જાગૃત કોટેચાએ જણાવ્યું હતું કે, “મધ્યપ્રદેશ સરકારના સમર્થનથી, અમે આ ક્ષેત્રના સામાજિક-આર્થિક લેન્ડસ્કેપને વધારવામાં પ્રભાવશાળી પ્રગતિને આગળ વધારતા અમારી પદચિહ્નને મજબૂત બનાવવાનું લક્ષ્ય રાખીએ છીએ.”

પેપ્સિકો ઇન્ડિયાના સિનિયર વાઇસ પ્રેસિડેન્ટ, બેવરેજિસ જ્યોર્જ કોવૂરે જણાવ્યું હતું કે નવું યુનિટ ભારતમાં કંપનીની બીજી ફ્લેવર મેન્યુફેક્ચરિંગ ફેસિલિટી હશે. દેશમાં વધતી માંગને પહોંચી વળવા માટે અમારા પીણાંના ઉત્પાદનમાં વધારો કરવાનો અમારો ઉદ્દેશ્ય છે. આ વ્યૂહાત્મક રોકાણ અમારા ગ્રાહકોને ઉચ્ચ ગુણવત્તાવાળા પીણાં પ્રદાન કરવા માટેના અમારા સમર્પણને મજબૂત બનાવે છે. તેમજ અમારી સમગ્ર કામગીરીમાં ટકાઉ પ્રવૃત્તિઓ જારી રાખવાની પ્રતિબદ્ધતાને પણ વેગ આપે છે.

ભારતમાં પેપ્સિકોની પ્રથમ ફ્લેવર મેન્યુફેક્ચરિંગ ફેસિલિટી પંજાબના ચન્નોમાં છે. પેપ્સિકો ઈન્ડિયાએ જણાવ્યું હતું કે તેના વૈશ્વિક સ્થિરતા લક્ષ્યોને અનુરૂપ, નવી ઉત્પાદન સુવિધા સંપૂર્ણપણે રિન્યુએબલ એનર્જી સ્રોતો પર કાર્ય કરશે જેના કારણે કાર્બન ફૂટપ્રિન્ટમાં પ્રતિદિન 1.9 મેટ્રિક ટન પ્રભાવશાળી ઘટાડો થશે.

ઝીરો લિક્વિડ ડિસ્ચાર્જ ટેક્નોલોજી સાથે, પ્લાન્ટનો ઉદ્દેશ્ય લગભગ 90 ટકા એકંદર જળ કાર્યક્ષમતા હાંસલ કરવાનો છે, જળ સંસાધનોનું જવાબદાર સંચાલન સુનિશ્ચિત કરવું અને સુવિધામાં વપરાતા 100 ટકા પાણીની ભરપાઈ કરવાનો છે.