Stock Market Crash: સેન્સેક્સ 736 પોઈન્ટ તૂટ્યો, SME IPO સિવાય તમામ ઈન્ડેક્સ 3 ટકા સુધી તૂટ્યા

અમદાવાદ, 19 માર્ચઃ શેરબજારની વોલેટિલિટી અને પ્રોફિટ બુકિંગના પગલે આજે સેન્સેક્સ 736 પોઈન્ટ તૂટ્યો છે. નિફ્ટી 22000નું લેવલ તોડ્યુ છે. એનએસઈ નિફ્ટી 238.25 પોઈન્ટ તૂટી 21817.45 પોઈન્ટ પર બંધ રહ્યો હતો. સેન્સેક્સ 736.37 પોઈન્ટ તૂટી 72012.05ની સપાટીએ બંધ રહ્યો હતો.

17 વર્ષમાં પ્રથમ વખત વ્યાજ દરોમાં વધારો કરવાના BoJના નિર્ણયને પગલે, એશિયન બજારોમાં ઘટાડાની અસર ભારતીય શેરબજાર પર પણ જોવા મળી હતી. સ્થાનિક બજારમાં કરેક્શન પણ પ્રીમિયમ પરની ચિંતાઓને કારણે ટ્રિગર થયું છે. મૂલ્યાંકન અને ફુગાવો અપેક્ષા કરતાં વધુ નોંધાતાં અમેરિકી ફેડ દ્વારા રેટ કટમાં વિલંબ, ડોલર ઈન્ડેક્સમાં વૃદ્ધિ જોવા મળી છે. રોકાણકારોએ હાલ ફેડના નિર્ણયની રાહ જોતા થોભો અને રાહ જુઓની નીતિ અપનાવી છે. વધુમાં, ક્રૂડ ઓઈલના ભાવમાં ધીમે ધીમે વધારો બજારના સેન્ટિમેન્ટને વધુ મંદ કરી રહ્યો છે.

મોતિલાલ ઓસ્વાલના રિટેલ રિસર્ચ હેડ સિદ્ધાર્થ ખેમકાએ જણાવ્યું હતું કે, નિફ્ટી તેના ચાવીરૂપ સપોર્ટ લેવલથી નીચે સરક્યો છે, જે સૂચવે છે કે આગામી થોડા દિવસોમાં નબળાઈ ચાલુ રહી શકે છે. મિડ અને સ્મોલ કેપ સહિત સમગ્ર માર્કેટમાં વેચવાલીનું દબાણ જોવા મળ્યું હતું. આઇટી, એફએમસીજી અને ફાર્મા ટોપ લુઝર્સ રહ્યા હતા. મોટાપાયે પ્રોફિટ બુકિંગ જોવા મળી રહ્યું છે. અમે અપેક્ષા રાખીએ છીએ કે બજાર કોન્સોલિડેશન મોડમાં રહેશે કારણ કે આજે શરૂ થનારી યુએસ ફેડની બેઠક સાથે સાવચેતી યથાવત છે. જ્યારે યુએસ ફેડ તેનું વલણ જાળવી રાખે અને દર યથાવત રાખે તેવી શક્યતા છે, તેની કોમેન્ટ્રી મહત્વની રહેશે કારણ કે તે સેન્ટ્રલ બેંકની ભાવિ દરની કાર્યવાહીનો આઉટલૂક રજૂ કરશે.

રૂપિયો 13 પૈસા ગગડ્યો

રૂપિયામાં 13 પૈસાનો ઘટાડો થયો છે, જે US ડૉલરની સામે ₹83.04 પર બંધ થયો છે. આ ઘટાડો મુખ્યત્વે ડૉલર ઇન્ડેક્સમાં નોંધપાત્ર વધારાને કારણે છે, જે $0.70 થી $103.70 સુધી વધ્યો છે. આ ઉછાળો યુએસ ફેડરલ સંબંધિત અપેક્ષાઓમાં ફેરફારને કારણે થયો છે.

બજારો હવે અપેક્ષા રાખે છે કે ફેડ માર્ચમાં વ્યાજ દરમાં ઘટાડો અટકાવશે, સંભવિતપણે તેમને જૂન અથવા જુલાઈ સુધી વિલંબિત કરશે. સેન્ટિમેન્ટમાં આ ફેરફારથી સમગ્ર બોર્ડમાં ડોલર મજબૂત થયો છે, જેના કારણે રૂપિયા સહિત અન્ય કરન્સી સામાન્ય રીતે નબળી પડી છે.

(Disclaimer: The information provided here is investment advice only. Investing in the markets is subject to risks and please consult your advisor before investing.)

(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ, ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો.)