Retail inflation સતત ત્રીજા મહિને ઘટી ડિસેમ્બરમાં 5.72%

નવી દિલ્હી: ડિસેમ્બરમાં રિટેલ ફુગાવો ઘટી 5.72 ટકા નોંધાયો છે. જે આરબીઆઈના કમ્ફર્ટ લેવલની અંદર નોંધાયો છે. કેન્દ્ર સરકાર દ્વારા જારી આંકડાઓ અનુસાર, ડિસેમ્બરમાં રિટેલ ફુગાવો ઘટી 5.72 ટકા નોંધાયો છે. જે નવેમ્બર, 2022માં રિટેલ ફુગાવો 5.88 ટકા હતો. ઓક્ટોબરમાં 6.77 ટકા અને સપ્ટેમ્બરમાં 7.41 ટકા હતો. ખાસ કરીને ખાદ્ય ચીજોના ભાવોમાં ઘટાડાની અસર રિટેલ ફુગાવા પર જોવા મળી છે. જો કે, ફ્યુલના ભાવોમાં વધારો જોવા મળ્યો છે.

ખાદ્યપદાર્થોનો મોંઘવારી દર ઘટ્યો

ડિસેમ્બરમાં ખાદ્યપદાર્થોનો મોંઘવારી દર ઘટીને 4.1 ટકા થયો હતો. અગાઉ નવેમ્બર મહિનામાં તે 4.67 ટકા નોંધાયો હતો. બીજી બાજુ ઇંધણ અને વીજળીનો મોંઘવારી દર વધીને 10.97 ટકા થયો, જે ગયા મહિને 10.62 ટકા હતો. મોંઘવારીમાં ફૂડ ઈન્ફ્લેશનનો હિસ્સો લગભગ 40 ટકા હોય છે.

ફેબ્રુઆરીના પ્રથમ સપ્તાહમાં આરબીઆઈની બેઠક

આરબીઆઈએ 7 ડિસેમ્બરે રેપો રેટ રેટ વધારીને 6.25 ટકા કર્યો હતો. જે બાદ બેન્કોએ બજારના નાણાં પ્રવાહને નિયંત્રિત કરવા માટે FD અને MCLR દર વધારવા પડ્યા હતા. RBIની આગામી મોનેટરી પોલિસીની બેઠક 6-8 ફેબ્રુઆરી 2023ના રોજ યોજાવાની છે. ફુગાવાને કાબૂમાં લેવા માટે આરબીઆઈ રેપો રેટમાં વધારો કરે તેવી શક્યતા છે.

ઔદ્યોગિક ઉત્પાદનમાં 7.1 ટકાનો વધારો

દેશના ઔદ્યોગિક ઉત્પાદનો નવેમ્બરમાં 7.1 ટકા વધ્યા છે. જે ઓક્ટોબરમાં 4.2 ટકાના સંકોચન સામે વધ્યા છે. નવેમ્બર, 2021માં ઈન્ડેક્સ ઓફ ઈન્ડસ્ટ્રીયલ પ્રોડક્શન (IIP) 1 ટકા વધ્યો હતો.  નવેમ્બર 2022માં મેન્યુફેક્ચરિંગ સેક્ટરનું ઉત્પાદન 6.1 ટકા વધ્યું હતું. ખાણકામનું ઉત્પાદન 9.7 ટકા વધ્યું હતું અને વીજ ઉત્પાદનમાં 12.7 ટકાનો વધારો થયો હતો.