ભારતી એરટેલનો Q2 નફો 38% ઘટીને રૂ. 1,341 કરોડ થયો, આવકો 7.28 ટકા વધી
મુંબઈ, 31 ઓક્ટોબરઃ ભારતી એરટેલે (Bharti Airtel) સપ્ટેમ્બરમાં પૂરા થયેલા ક્વાર્ટરમાં રૂ. 1340.7 કરોડનો કોન્સોલિડેટેડ ચોખ્ખો નફો નોંધાવ્યો છે, જે ગયા વર્ષના સમાન ક્વાર્ટરમાં રૂ. 2,145.2 કરોડ કરતાં 37.50 ટકા ઘટ્યો છે.
તેની કામગીરીમાંથી આવક રૂ. 37,043.8 કરોડ થઈ હતી, જે ગયા નાણાકીય વર્ષના સમાન ક્વાર્ટરમાં રૂ. 34,526.8 કરોડ સામે 7.28 ટકા વધી છે. બ્રોકરેજના પોલ મુજબ, ભારતી એરટેલે સપ્ટેમ્બરમાં પૂરા થયેલા ક્વાર્ટરમાં રૂ. 38,259 કરોડની આવક થવાની ધારણા હતી, જે 10.8 ટકા ઓછી છે.
કંપનીનું EBITDA રૂ. 17,721.2 કરોડ સામે 10.96 ટકા વધીને રૂ. 19,665 કરોડ થયું હતું, EBITDA માર્જિન 20 બેસિસ પોઈન્ટ ઘટીને 53.1 ટકા થયું છે.
મહિને સરેરાશ આવક પ્રતિ યુઝર (ARPU) 1.5 ટકા વધીને 203 રૂપિયા થઈ ગઈ છે. વિશ્લેષકોએ ARPU 1.6 ટકાથી 2.2 ટકા ક્વાર્ટર-ઓન-ક્વાર્ટર વચ્ચે વધવાની અપેક્ષા રાખી હતી.
કંપનીનું દેવું ઘટ્યું
30 સપ્ટેમ્બર, 2022ના રોજ કંપનીનું ચોખ્ખુ દેવું 1,57,277.6 કરોડની સરખામણીમાં 30 સપ્ટેમ્બર, 2023ના રોજ રૂ. 1,47,459.3 કરોડ નોંધાયું છે. સ્થાનિક સ્તરે મોબાઈલ, હોમ સર્વિસ અને ડિજિટલ ટીવી સર્વિસ સેગમેન્ટ સહિતની ભારતની આવક રૂ. 26,994,7 કરોડ હતી, જે ગયા વર્ષના સમાન ક્વાર્ટરમાં રૂ. 24,333.3 કરોડની સરખામણીમાં 10.9 ટકા વધી છે.
કંપનીને 1.72 લાખ કરોડની પેનલ્ટી
બીએસઈ ખાતે કંપની દ્વારા જારી કરવામાં આવેલા નોટિફિકેશન અનુસાર, ભારતી એરટેલ પર ડિપાર્ટમેન્ટ ઓફ ટેલિકોમ્યુનિકેશન્સ, ઉત્તર પ્રદેશ પૂર્વ LSA (DoT), દ્વારા લાયસન્સ કરાર હેઠળ સબસ્ક્રાઇબર વેરિફિકેશનના ધોરણોના સંદર્ભમાં નિયમો અને શરતોના કથિત ઉલ્લંઘન બદલ 1.72 લાખ રૂપિયાની પેનલ્ટી વસૂલવામાં આવી હતી.