Rupee vs Dollar: રૂપિયામાં ઘટાડાનો દોર યથાવત, 91નું નવુ તળિયુ વટાવે તેવી ભીતિ

અમદાવાદ, તા. 16 ડિસેમ્બરઃ ફોરેક્સ માર્કેટમાં ડોલર સામે રૂપિયામાં નબળાઈ અટકવાનું નામ લઈ રહી નથી. ગઈકાલે સોમવારે પણ રૂપિયો વધુ 25 પૈસા તૂટી નવી 90.74ની ઓલટાઈમ લૉ સપાટીએ બંધ રહ્યો હતો. જે ઈન્ટ્રા ડે 90.80ના ઐતિહાસિક તળિયે પહોંચ્યો હતો.
વિદેશી રોકાણકારોની વેચવાલી અને અમેરિકા-ભારત વચ્ચે વેપાર કરારની અનિશ્ચિતતાઓ વચ્ચે રૂપિયો સતત કડડભૂસ થઈ રહ્યો છે. આરબીઆઈ પણ કોઈ ખાસ દરમિયાનગિરી દર્શાવી રહી નથી. પરિણામે ફોરેક્સ ટ્રેડર્સના મતે, રૂપિયો ડોલર સામે વધુ તૂટી 91નું લેવલ ક્રોસ કરશે.
એલકેપી સિક્યોરિટીઝના કોમોડિટી અને કરન્સીના રિસર્ચ એનાલિસ્ટ જતિન ત્રિવેદીએ જણાવ્યું હતું કે, ભારત-અમેરિકા વેપાર કરારમાં વિલંબ અને એફઆઈઆઈની વેચવાલીના કારણે ડોલર સામે રૂપિયામાં પ્રેશર વધ્યું છે. બીજી બાજુ ગોલ્ડ-સિલ્વરના ભાવોમાં વૃદ્ધિના કારણે ભારતના આયાત બિલ પર બોજો વધશે. ડોલર સામે રૂપિયો 90-91.25ની રેન્જમાં રહેવાની ભીતિ છે.
રૂપિયામાં કડાકા પાછળના કારણો
અમેરિકાના પ્રમુખ ડોનાલ્ડ ટ્રમ્પનો ભારત પર 50 ટકા વધારાનો ટેરિફના બોજોના કારણે જીડીપી ગ્રોથ 60-80 બેઝિસ પોઈન્ટ ઘટ્યો છે. રાજકોષિય ખાધમાં પણ વધારો થયો છે. નિકાસો ઘટી છે. જેથી ફોરેન એક્સચેન્જ ઈનફ્લોમાં ઘટાડો નોંધાયો છે. જેણે રૂપિયા પર બોજો વધાર્યો છે.
ભારતીય મૂડી બજારમાંથી એફઆઈઆઈ જુલાઈ, 2025થી એકંદરે વેચવાલ રહ્યા છે. ટેરિફના કારણે વિદેશી રોકાણકારોએ લગભગ 1.55 લાખ કરોડથી વધુનું રોકાણ પાછું ખેંચ્યું છે. જેના લીધે ડોલરની માગ વધી છે.
ઓઈલ ને ગોલ્ડ કંપનીઓ હેજિંગ માટે ડોલરની ખરીદી વધારી રહી છે. આયાતકારો પણ ટેરિફની અનિશ્ચિતતાઓના કારણે ડોલર વાયદાનું પ્રમાણ વધાર્યું છે. જેણે રૂપિયા પર પ્રેશર સર્જ્યું છે. અને રૂપિયાને તૂટતો બચાવવામાં આરબીઆઈની દખલગિરી વર્તમાન સમયમાં મર્યાદિત છે.

(Disclaimer: The information provided here is investment advice only. Investing in the markets is subject to risks and please consult your advisor before investing.)

(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ/ ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો.)