લિંકન ફાર્માસ્યુટિકલ્સનો Q3 સ્ટેન્ડઅલોન ચોખ્ખો નફો રૂ. 20.77 કરોડ થયો

અમદાવાદ, 14 ફેબ્રુઆરી: લિંકન ફાર્માસ્યુટિકલ્સ લિમટેડે ડિસેમ્બર 2024ના રોજ પૂરા થતા નાણાંકીય વર્ષ 2025ના ત્રીજા ત્રિમાસિક ગાળા માટે રૂ. 20.77 કરોડનો સ્ટેન્ડઅલોન ચોખ્ખો નફો નોંધાવ્યો છે જે ગત નાણાંકીય વર્ષના સમાન ગાળામાં રૂ. 28.04 કરોડ હતો. નાણાંકીય વર્ષ 2025ના ત્રીજા ત્રિમાસિક ગાળામાં કામગીરીથી આવકો રૂ. 146.55 કરોડ નોંધાઈ હતી જે ગત નાણાંકીય વર્ષના સમાન ગાળામાં રૂ. 146.45 કરોડ હતી. કંપનીએ નાણાંકીય વર્ષ 2025ના ત્રીજા ત્રિમાસિક ગાળામાં રૂ. 32.63 કરોડની એબિટા નોંધાવી હતી જે ગત નાણાંકીય વર્ષના આ જ ગાળામાં રૂ. 40.68 કરોડ હતી. નાણાંકીય વર્ષ 2025ના ત્રીજા ત્રિમાસિક ગાળા માટે ઇપીએસ શેરદીઠ રૂ. 10.37 રહી હતી.

ડિસેમ્બર 2024ના રોજ પૂરા થતા નવ મહિના માટે કંપનીએ રૂ. 92.94 કરોડનો કરવેરા પૂર્વેનો નફો નોંધાવ્યો હતો જે નાણાંકીય વર્ષ 2024ના નવ મહિનામાં રૂ. 100.03 કરોડ હતો. વિદેશી સંસ્થાકીય રોકાણકારો (એફઆઈઆઈ)એ કંપનીમાં તેમનો હિસ્સો ડિસેમ્બર 2023માં 3.22 ટકાથી સ્થિર ગતિએ વધારીને ડિસેમ્બર 2024 સુધીમાં 5.16 ટકા કર્યો હતો. સ્પષ્ટ વૃદ્ધિ વ્યૂહરચના સાથે કંપની હાઇ વેલ્યુ પ્રોડક્ટ્સમાં વ્યવસાયના વિસ્તરણ અને નવા બજારોમાં પ્રવેશના પગલે નાણાંકીય વર્ષ 2026માં રૂ. 750 કરોડની આવકનો લક્ષ્યાંક રાખી રહી છે. નોંધનીય છે કે કંપની એવી જૂજ કંપનીઓમાં સ્થાન ધરાવે છે જેણે નાણાંકીય વર્ષ 2013થી નાણાંકીય વર્ષ 2024 સુધી દરેક વર્ષે સતત ચોખ્ખા નફામાં વૃદ્ધિ નોંધાવી હોય.

પરિણામો અને કામગીરી અંગે ટિપ્પણી કરતાં લિંકન ફાર્માસ્યુટિકલ્સ લિમિટેડના મેનેજિંગ ડિરેક્ટર મહેન્દ્ર પટેલે જણાવ્યું હતું કે, કંપની સંપૂર્ણ દેવામુક્ત સ્થિતિ જાળવી રાખીને સતત વૃદ્ધિ જાળવી રાખવાનો હેતુ ધરાવે છે. અમે નાણાંકીય વર્ષ 2026 સુધીમાં 750 કરોડ આવકનો લક્ષ્યાંક હાંસલ કરવાના માર્ગે છીએ.

નાણાંકીય વર્ષ 2025ના નવ મહિનાની કામગીરી પર એક નજરઃ ડિસેમ્બર 2024ના રોજ પૂરા થયેલા નવ મહિના માટે, કંપનીએ કામગીરીમાંથી રૂ. 455.05 કરોડની સ્ટેન્ડઅલોન આવક નોંધાવી હતી જેની સામે અગાઉના નાણાંકીય વર્ષના સમાન સમયગાળામાં કામગીરીથી આવક રૂ. 438.06 કરોડ રહી હતી. ડિસેમ્બર 2024ના રોજ પૂરા થયેલા નવ મહિનામાં કંપનીનો ચોખ્ખો નફો રૂ. 70.77 કરોડ નોંધાયો હતો જેની સામે ગયા વર્ષના સમાન સમયગાળામાં રૂ. 74.71 કરોડનો ચોખ્ખો નફો હતો. ડિસેમ્બર 2024ના રોજ પૂરા થયેલા નાણાંકીય વર્ષ 2025ના નવ મહિનામાં એબિટા રૂ. 104.13 કરોડ રહી હતી જેની સામે નાણાંકીય વર્ષ 2024ના નવ મહિનામાં એબિટા રૂ. 108.93 કરોડ રહી હતી. નાણાંકીય વર્ષ 2025ના નવ મહિના માટે ઇપીએસ રૂ. 35.33 પ્રતિ શેર નોંધાઈ હતી. નાણાંકીય વર્ષ 2025ના નવ મહિનામાં નિકાસ (એફઓબી) રૂ. 271.83 કરોડ નોંધાઈ હતી.

(Disclaimer: The information provided here is investment advice only. Investing in the markets is subject to risks and please consult your advisor before investing.)

(સ્પષ્ટતા: અત્રેથી આપવામાં આવતી તમામ પ્રકારની માહિતી કોઇપણ પ્રકારે રોકાણ/ ટ્રેડીંગ માટેની સલાહ નથી. બજારોમાં રોકાણ જોખમોને આધીન છે અને રોકાણ કરતા પહેલા કૃપા કરીને તમારા સલાહકારની સલાહ લો.)